آناديلي گونو قوتلو اولسون

يونسكو گئنل قورولو ۱۹۹۹ - ينجي ايلينده ۲۱ فئورال گونونو  " اولوسلار آراسي آنــاديــلي گــونو " اولاراق قبول ائتدي. بو گون ايلك اولاراق ۲۰۰۰- ينجي ايليندن بو يانا دونيا چاپيندا قوتلانماغا باشلانيب .دونيانين ان قايدالي ديللرينين اوچونجوسو ساييلان آناديليميز توركجه،دونيانين ان چوخ قونوشولان اون ديليندن بيريدير.اوروپادا ايسه  قونشولان ايكينجي بؤيوك ديل ساييلير.بو مناسيبته گؤره آناديلينه حصر اولان شعرلرين توپلوسو حاضيرلانماقدادير . سئويملي اوخوجولار اؤز شئعرلريني ياخود سئوديكلري باشقا شاعيرلريميزين شئعرلريني بو مجموعه يه آرتيرا بيلرلر.

 آنادیلی گونو حاققیندا باشقا یازیلار

آنادیلی شئعیرلرینین موبایل کیتابینی بوردان ائندیرین

آنادیلی شئعیرلری

آنا ديليم-آناديليم
سن شرفيم شوهره تيم سن

دوداغيمدا حسر تيم سن

َدوشمانلارا نيفر تيم سن

كيمدير سني دانا ديليم ‌

آنا ديليم-آناديليم

****

يازانمادي اليم سني

دوغراديلار ديليم سني

قان آغلادئ ائليم سني!!

بويانماسين قانا ديليم

آناديليم-آناديليم

****

سن ابدي واريم منيم

دارگونومده ياريم منيم

سينه م اوسته تاريم منيم

قالدئ يانا-يانا ديليم!!

آناديليم-آناديليم

****

دولوخسانما گلر سحر

گؤزياشينئ سيلر سحر

نور ساچينا الر سحر

چيچك له نر آنا ،ديليم

آناديليم-آناديليم

****

دونيا بويو  يوكسك اوجا

سوليماندان نوحدان قوجا

گووه نيرم من دويونجا

بو شوهره ته شانا، ديليم

آناديليم-آناديليم

فيض اله بختياري (دومان)

اللی دئسن...

آخــــی بيــزيـم ديليميـز وار
نـــدن بئـلـه لاللاشيـريق ؟
دونـوخـاراق فيکيـــريميــــــز
گونوـ گونــــدن کاللاشيريق

اونــوتمــــوشوق اؤزومـــوزو
کول ائتميشيک کـــؤزوموزو
اويــور قـارغـا گـــؤزومـــــوزو
بـاخا ـ بـاخا، خـوللاشيريق

خالق دونيانيــن هاراسيندا
درديـن تـاپيب چـاراسينــدا
ايکی ايلــــه اوچ آراسيندا
بيــزلــر هلـه ، دالاشيريــق

گـونش شاخير آييل ـ آييل
اويـخويـا چـوخ اولما مـاييل
خورنـامـاغين واقتی دئييل
کروان کؤچوب ، آراشيريــق

خالـــق، آيـريليقــدان داد تپيـر
گـؤزلــرينـدن اولـــدوز سپيــــر
بيرليک دئيه ، زاغ ـ زاغ اسيـر
بيــزلـر ايسه قـاشلاشيريــق

گؤرمــــــک اوچون گؤزوموز وار
دانــيشماغـا سؤزومـــــوز وار
اللــــی دئسن ، يـوزومـوز وار
اؤلکه لــرده سانــلاشيريــــق

تاريـخ لــرده قــــويموشوق ايز
کؤک آتميشيق باتي يـا بيــز
کيم گؤروبدو تورک، چؤکه ديز
بيز ، ان بويـــوک آد داشيريق

يئتــر بيـزه بــو شان ، ويـقار
قـورقـود کيمی بـابـاميـز وار
ائـليميـــز وار ، اوبـاميـــز وار
گونو ـ گونـدن بـوللاشيريـق

بـوغـازدا فـريـاديميــــــــــــــــــز وار
بـاغيـــرساق ، امــداديميــــــز وار
((ب ، ام ، ت )) آديـميـــــــــــز وار
بـو نـه سؤزدو ، سوس يـاشيريق !

ابو طالب اللهیاری "توتقون"

   آنا  ديلي   

  ديل آچاندا ايلک دفعه  « آنا » سؤيله ييريک بيز، 

  « آنا ديلي » آدلانير بيزيم ايلک درسليگيميز. 

  ايلک ماهنيميز لايلاني آناميز اؤز سودويله 

  ايچيرير روحوموزا بو ديلده گيله - گيله. 

    

  بو ديل  بيزيم روحوموز، عشقيميز، جانيميزدير، 

  بو ديل  بير- بيريميزله عهدي- پئيمانيميزدير. 

  بو ديل  تانيتميش بيزه بو دونيادا هر شئيي، 

  بو ديل  اجداديميزين بيزه ميراث وئرديگي 

  قييمتلي خزينه دير…اونو گؤزلريميز تک 

  قورويوب، نسيللره بيز ده هديه وئرک. 

    

  بيزيم اوجا داغلارين سونسوز عظمتيندن، 

  ياتاغينا سيغمايان چايلارين حيددتيندن، 

  بو تورپاقدان، بو يئردن، 

  ائلين باغريندان قوپان يانيقلي نغمه لردن، 

  گوللرين رنگلريندن، چيچکلرين ايگيندن، 

  ميل دوزونون، موغانين سونسوز گئنيشليگيندن، 

  آغ ساچلي بابالارين عقليندن، کاماليندان، 

  دوشمن اوستونه جومان او قيراتين ناليندان 

  قوپان سسدن ياراندين. 

  سن خالقيمين آلديغي ايلک نفسدن ياراندين. 

    

  آنا ديليم،  سنده دير خالقين عقلي، حيکمتي، 

  عرب اوغلو مجنونون دردي سنده ديل آچميش. 

  اورکلره يول آچان فوضولي نين صنعتي، 

  ائي ديليم، قودرتينله دونيالارا يول آچميش. 

  سنده منيم خالقيمين قهرمانليقلا دولو 

  تاريخي واراقلانير، 

  سنده نئچه مين ايلليک منيم مدنيتيم، 

  شان- شؤهرتيم ساخلانير. 

  منيم آديم- سانيمسان، 

  ناموسوم، ويجدانيمسان! 

    

  بو ديل  تانيتميش بيزه بو دونيادا هر شئيي، 

  بو ديل  اجداديميزين بيزه قويوب گئتديگي 

  ان قييمتلي ميراثدير، اونو گؤزلريميز تک 

  قورويوب، نسيللره بيز ده هديه وئرک! 

    

  ائي اؤز دوغما ديلينده دانيشماغي آر بيلن 

  فاسونلو ادابازلار، 

  قلبينيزي اوخشامير قوشمالار، تئللي سازلار. 

  بونلار قوي منيم اولسون، 

  آنجاق وطن چؤرگي، 

  بير ده آنا اورگي.* 

  سيزلره قنيم اولسون. 

بختيار وهاب زاده

*بو ميصراعني س.وورغون علاوه  ائتميشدير. 

     دوغما ديليميز

بیز واریق وارسا وطن وارایسه دوغما دیلیمیز

اؤیره نیب بیلمه لیدیر    اؤز دیلینی ائللریمیز

آنا تک جاندان عزیزدیر  آنا تورپاق   آنا دیل

حورمتین ساخلا یاشارکن   آنالار قدرینی بیل

وطنین کیملیگیدیر   وارلیغینین    داش تملی

کیملیگین بایراغیدیر هر بالانین  دوغما دیلی

آنا دیلدیر بزه ین   دویغولارین     اویلاغینی

سوسله ین آرزیلاری سئوگی سئوینجین باغینی

بولبول اؤز دوغما دیلیله گوله سؤیلر سؤزونو

هر گول اؤز رایحه سیله  تانیدار  اؤز اؤزونو

آنا دیلدیر داشییان لایلالارین      جان دادینی

آنا دیلدیر یاشادان   ائولادینین        اؤز آدینی

آنا دیلدیر ائلینین تاریخی         آیدین تانیغی

یوردونون اؤلکه سینین آیناسی سؤنمز چراغی

آنا دیلده آنانین سئوگیسی عطری  دادی وار

آنا دیلده    وطنین  شانلی شرفلی    آدی  وار

اسماعيل جميلي

آناديلي

بير گون اسير دوشموش بير قهرماني 

  سورغويا، سوالا چکنده جللاد: 

  - سيزين الينيزده اؤلمرم! - دئدي، - 

  مني زامان- زامان ياشادار حيات. 

  دئديلر: - گؤزونو اوياريق سنين، 

  گؤره بيلمزسن. 

  دئدي: - ياشارام! 

  دئديلر: - قولونو قيراريق سنين، 

  سيلاحين، کسرين دوشر اليندن. 

  دئدي: - ياشارام! 

  دئديلر: - قيچينا کونده ووراريق، 

  گزه بيلمزسن. 

  باشيندا ائله بير تونقال قالاريق 

  دؤزه بيلمزسن. 

  دئدي: - ياشارام! 

  دئديلر: - نيين وار آپاراريق بيز،  

  بير ده کئچميشينه دؤنه بيلمزسن. 

  دئدي: - ياشارام! 

  دئديلر: - ديليني قوپاراريق بيز، 

  دانيشا بيلمزسن، دينه بيلمزسن. 

  سوسدو قهرمان، 

  نه ياشارام دئدي، نه اؤللم دئدي. 

  سؤيله دي: - نه بيلسن ائله، ائي جللاد. 

  ديوان سنيندير، 

  دؤوران سنيندير… 

بالاش آذر اوغلو

 

آناديليم 

 قالخيب شاهداغينا سؤز ايسته ييرم، 

  چاتسين هاي- هاراييم دينله ينلره. 

  من نانکور دئييرم، ناجينس دئييرم 

  اؤز آنا ديليني بيلمه ينلره! 

    

  بو ديل شيرينليکده شربت کيميدير، 

  صافليغي قورونان سرحد کيميدير، 

  آناميز وطن ده قوربت کيميدير 

  اؤز آنا ديليني بيلمه ينلره! 

    

  دؤيوشده برکيييب ائل پولاد اولور، 

  زيروه يه اوچماغا  ديل قاناد اولور، 

  تورپاغين سئوينجي، دردي ياد اولور 

  اؤز آنا ديليني بيلمه ينلره! 

  توفيق  بايرام 

 

  ساغ اول ، آنا ديليم

    يوللاريم سيناندي ياد اؤلکه لرده، 

  نئچه ياد دوداقدا سسلندي آديم. 

  ساغ اول، آنا ديليم، مني هئچ يئرده 

  کؤمکسيز قويمادين، يالقيز قويمادين. 

    

  بارماغيم آلتيندا دويمه فيرلانير، 

  لوندونلا، پاريسله ياناشي باکي… 

  دوغما سؤزلر اوچون داريخان هاني؟ 

  دئيين قوي دينله سين: «دانيشير باکي!» 

    

  دانيشير، آچيلير عؤمرون باهاري، 

  دونيايا من اونون قوينوندان اوچدوم. 

  منيم اورگيمين آنتئنالاري 

  گؤزل آذربايجان ديلينه توشدو. 

    

  دؤيوشده قيلينج تک سييريلدي قيندان، 

  باشيمين اوستونده بايراغيم اولدو. 

  تورپاغيم ايکييه بؤلونن زامان 

  بو ديل بؤلونمه ين تورپاغيم اولدو. 

    

  اوتانسين تاريخه دللالليق ائدن، 

  تاريخ قاپيسينا آچار سؤزلر وار. 

  پردني قالديرسان، بئش-اون کلمه دن 

  قوندارما جيلدلر تار-مار اولار. 

    

  بو ديلده سئوينجيم، غميم، کدريم 

  تزه اوميدلره آچيلان سحر. 

  بو ديلين رئاکتيو طياره لري 

  آراز سرحدديني قيران کلمه لر. 

  ايپک نغمه لريم گولـله باتمازدي، 

  قولونو قانداللا باغلاماق اولماز. 

  بو تايدان او تايا آرخايين کئچن، 

  او تايدان بو تايا آرخايين کئچن 

  ديلين سنديني يوخلاماق اولماز، 

  سئوگي نين يولونو ساخلاماق اولماز! 

    

  ساغ اول، آنا ديليم، آنا اؤيودوم، 

  فوضولي عشقيندن ديوانه ديليم. 

  اورگيم باشينا نفس درمه دن 

  فيرلانيب کول اولان پروانه ديليم. 

    

  هاني خانيم چايلار، هاني بي گؤللر، 

  ديللرده جوجرن يوردون ايزيدير. 

  يوز يول يارالانميش دوغما کلمه لر 

  خالقيمين دؤيوشلر خريطه سيدير. 

    

  آلا داغ، قارا داغ…دي سئچ، دي آيير، 

  داغلاري باسيلماز اوردوم سانميشام. 

  هاردا بيرجه کلمه سؤزوم ياشايير، 

  اوراني حالالجا يوردوم سانميشام. 

    

 اوستونه يويوردو قورآن ديللري، 

  پئيغمبر ديللري، قانون ديللري… 

  قاپيلار داليندا قويدولار سني، 

  حاق دئدين، داباندان سويدولار سني، 

  آنجاق محو اولمادين، آنام، جان  ديليم، 

  اوردولار سارسيدان قهرمان ديليم! 

    

  عؤمروم قيريلمازدي، يول قيريلسا دا، 

  سنينله هميشه من اوزوآغام. 

  بدنيم تورپاغا تاپشيريلسا دا، 

  روحومو من سنه تاپشيراجاغام. 

      صابير   روستم خانلي

 

ديليم         

   فوضولي زيروه لي، واقيف آخارلي، 

  منيم قورقود ديليم، علسگر ديليم! 

  عؤمرومون ناخيشي، بختيمين خالي، 

  داددا، شيرينليکده بال، شکر ديليم! 

    

  گؤزومون نوروسان، باشيمين تاجي، 

  سن يوللار سوپورن اتک اولمادين. 

  هئچ زامان چکمه دين سؤز احتيياجي، 

  هئچ زامان ديننده پلتک اولمادين. 

    

  دردلي آنالارين باغريندان قوپان، 

  نئچه يول داغلانيب، ازيلن ديليم. 

  روحوما ايشله ين، قانيما هوپان 

  سازين پرده سيندن سوزولن ديليم! 

    

  دوشمن دؤندرنده تويلاري ياسا 

  دوروب بويلانماغين يئري وارديمي؟ 

  سنين قودرتينه آرخالانماسا، 

  خطاي قيلينجدان ياپيشارديمي؟! 

    

  باياتي بئشيگي، لايلا يوواسي، 

  منيم تارلي ديليم، کامانلي ديليم. 

  کيم ا سه  هميشه باهار هاواسي، 

  کيم اسه  هميشه دومانلي ديليم! 

    

  «انا الحق » بايراقلي، « حئيرت » نيدالي، 

  ميصري قيلينجيم تک کسرلي ديليم! 

  نعره لي، لهجه لي، سسلي، صدالي، 

  شعرلي، نغمه لي، اثرلي ديليم! 

    

  بولوددان سييريليب، گونشدن چيخيب، 

  گؤيلرين تاختيندان ائنيب گلميسن! 

  اؤلمز داهيلرين اليني سيخيب، 

  تانري قودرتينه دؤنوب گلميسن! 

    

  هر گون چيچک آچيب، بار- بهره وئريب، 

  ديليمدن گوج آليب ائليمين کؤکو. 

  ائليمه، گونومه گؤر نه لر وئريب، 

  سؤزومون شيره سي، ديليمين کؤکو. 

    

  دونيانين قلبينه ياتان ديليمين 

  اؤزولو  بير اؤلمز روحدادي، بلکه؟ 

  بوداغي بو گونه چاتان ديليمين 

  کؤکو آدمده دي، نوحدادي، بلکه؟ 

    

  فوضولي زيروه لي، واقيف آخارلي، 

  منيم قورقود ديليم، علسگر ديليم! 

  عؤمرومون ناخيشي، بختيمين خالي، 

  داددا، شيرينليکده بال- شکر ديليم! 

زليمخان يعقوب

   

  آنا ديليم

   عصرلرين سيناغيندان 

  متين چيخان موقدسيم، 

  مشققتلي بير طالعنين 

                                بوللورلوغو، حيات درسيم- 

                                        آنا ديليم، 

  بوتؤلوگوم،  

  آيدينليغيم، 

   اعتيقاديم، 

            سيرريم، سِحريم… 

                ييغين- ييغين،   

                                        پرن- پرن، 

                                        داغين- داغين، 

            حيکمت نهريم - 

                       آنا ديليم. 

            حسن اوغلوم، 

                                        شاه خطاييم، 

                                        ميرزه فتعليم - 

            آنا ديليم… 

            بيزي مسلک ياشاتسا دا، 

            زامان- زامان 

                                        سؤزوموزو، 

                                        فيکريميزي، 

                                        نغمه ميزي 

            بيز دؤردنالا چاپامماديق. 

            زامان- زامان حاقسيزليغين 

                                          پنجه سيندن ساپامماديق. 

            زامان- زامان 

                                         قوووردولار تورپاغيمي، 

            قورونو دا اله ديلر. 

            زامان- زامان جاهانگيرلر 

            اود يوردومو 

                                    قيزيل قانا بله ديلر، 

             

            فقط 

            يئنه روحومو شاد، 

                                               ديري بيلديم،  

            آنا ديليم. 

            مردليگيندن کوروغلومون 

            ار قوللاري چاتيلسا دا، 

            شفا، 

                                              بوللور قايناغيما 

            ياد آخاري قاتيلسا دا، 

            زامان- زامان  

            بو چئشمه نين صاف سويونو  

                                              دورر بيلديم. 

            آنا ديليم. 

            مين ايلليکلر اؤتوب کئچديک، 

            ايزيم ايتمز ايننن بئله. 

            هلم-  هلم سؤنمز اولدوم، 

            فيکريم بيتمز ايننن بئله. 

            …قورقود قوپوزلو، 

            زردوشت حئيرتلي، 

            جاوانشير قيلينجلي، 

            وطن غئيرتلي، 

            مؤحتشميم، اوجام، اولوم - 

            آنا ديليم. 

    صابير  آرازلي 

         

   آناديليم

   سني شفق بيلديم بو جاهاندا من، 

  بعضاً شيمشک اولوب غضبله چاخدين. 

  ايلک دفعه  دونيايا گؤز آچاندا من 

  قلبيمه گونشين اؤزويله آخدين. 

    

  آنا گؤزلريندن سوزن نور کيمي 

  هوپدون اورگيمه سن گيله- گيله، 

  هر کلمه ن، هر سؤزون بزه نمه ييب مي؟

  مئهريبان آنامين تبسسومويله؟! 

 

…اوجالير باغچادان بولبولون سسي، 

  چاي سوسور، اسمه يير، چمنده يئل ده. 

  نه قدر دوغمادير اونون نغمه سي، 

  بولبول ده ائله بيل اؤتور بو ديلده. 

        نبي  خزري      

توركون ديلي

توركون ديلي تك سئوگيلي، ايستكلي ديل اولماز

 اؤزگه ديله قاتسان بو اصيل ديل اصيل اولماز

اؤز شعريني فارسا - عربه قاتماسا شاعير

 شعري اوخويانلار ، ائشيدنلر كسيل اولماز

فارس شاعيري چوخ سؤزلريني بيزدن آپارميش

  ((صابر))كيمي بير سفره لي،شاعير،پخيل اولماز

توركون مثلي،فولكلوري دونيادا تك دير

 خان يورقاني، كند ايچره مثل دير ميتيل اولماز

آذر قوشوني ، قيصر رومي اسير ائتميش

كسري سؤزودير بير بئله تاريخ ناغيل اولماز

چوخ قيسا بوي اولسان اوليسان جين كيمي شيطان

 چوق دا اوزون اولما كي اوزوندا عقيل اولماز

آزاد قوي اوغول عشقي طبيعتده بولونسون

 داغ - داشدا دوغولموش ده لي جيران حميل اولماز

بو((شهريار))ين طبعي كيمي چيمملي چئشمه

 كوثر اولا بيلسه دئميرم ، سلسيبل اولماز

                                                                                                                    شهریار

آنا ديلي

سو دئییب دیر آنام اولده منه آب کی یوخ

یوخو اؤیرتدی اوشاقلیقدا منه خواب کی یوخ
 

ایلک دفعه کی چؤرک وئردی منه نان دئمه دی
                
 اوليندن  منه دوزدانه  نمکدان  دئمه دی
 

آنام اختر دئمه ییبدیر منه اولدوز دئیب او
                  
 سو دوناندا دئمه ییب یخدی بالا بوز دئییب او


قار دئیب برف دئمه ییب دست دئمه ییب ال دئیب او

 منه هئچ واخت بیا سؤیله مه ییب گل دئیب او


یاخشی خاطیرلایرام یاز گونو آخشام چاغیلار
 
 باغچانین گون باتانینداکی ایلیق گون یاییلار


گل دئیردی داراییم باشیوی ای نازلی بالام

گلمه سن گر باجینین آستاجا زولفون دارارام


او دئمه زدی کی بیا شانه زنم بر سر تو
                         
 گر نیایی بزنم شانه سر خواهر تو


بلی داش یاغسادا گؤیدن سن اوسان منده بویام
                
 وار سنین  باشقا آنان واردی منیم باشقا آنام


اوزومه مخصوص اولان باشقا ائلیم واردی منیم

 ائلیمه مخصوص اولان باشقا دیلیم واردی منیم


ایسته سن قارداش اولاق بیر یاشایاق بیر لیک ائده ک
           
وئریبن قول قولا بوندان سورا بیر یولدا گئده ک


اولا اؤزگه کولک لره گرک آخمایاسان
         
ثانیا وار لیغیما خالقیما خور باخمایاسان


یوخسا گر زور دئیه سن ملتیمی خوار ائده سن

 گون گلر صفحه دؤنر مجبور اولارسان ... گئده سن

محمد تقی ذهتابی

 

گؤزل تورکجه م آنا دیلیم

گوندوز منیم گونشیمسن

گئجه یاتان اوز قند دیلیم

واز کئچیلمزبیر ائشیم سن

گؤزل تورکجه م آنا دیلیم.

بیر سوکیمی آخیجی سان

دیلبر کیمی یاخیجی سان

هم دادلی سان هم آجی سان

گوزل تورکجه م آنا دیلیم.

ایپک کیمی بوکولور سن

یوماق کیمی سوکولورسن

اینجی کیمی تؤکولورسن

گؤزل تورکجه م آنا دیلیم.

چوخ نازیک سن یارپاق کیمی

موقددس سن تورپاق کیمی

شرفلی سن بایراق کیمی

گؤزل تورکجه م آنا دیلیم.

دنیز قده ر انگین سن سن

آهنگلی زنگین سن سن

منیم بیر تک دنگیم سن سن

گؤزل تورکجه م آنا دیلیم.

سن سیز دونیا حارام منه

سن سیز یاشام – ورم منه

نئشه سئوینج وئرن منه

گؤزل تورکجه م آنا دیلیم.

 

من و آناديليم

  گئجه لريم گوندوزه جالانديقجا تالانديم، 

  سکسن ايلليک بير عؤمرون اوجاغيندا قالانديم. 

  ساحيلده يم،يول اوسته لپه لريم هوجومدا، 

  دايانميشام داغ کيمي حئيران قاليب هوجومدا. 

  تکلنميشم ،سئيره ليب همياشلاريم اجلدن، 

  کؤورلميشم، باخ بودور افکاريمي گيجلدن. 

  ياشيم اوسته ياش گليب قالانسادا غميم کم، 

  هله وارام،دالينجا سوروندوکجه بو کؤلگم. 

  بو گليملي-گئديملي دونياميزدا نه وار کي، 

  نسيللر گليب گئدير،نه آخيري نه ايلکي. 

  سن عؤمرونو ياشينلا اؤلچوب،پيچمه آماندير، 

  گنج ياشيندا قوجالديم سؤيله مگين گوماندير. 

  سارماشيقلار داياقسيز،بويلانسادا اوجالماز، 

  گنجليغي قوجاليقدا آختارانلار قوجالماز . 

  فلکدنمي گؤروم من طالعين رنگي، 

  ندير حؤکمو دانماغين بير ديلين آهنگي؟ 

  يوخ فلکدن دئييل بو، فيرلانسادا ترسينه 

  دامغالانديق توش اولدوق،دار گؤزلرين ايريثينه. 

  منيم ديليم، شوخ ديليم ،شعري دوزلو ،سؤزو تر 

  فوضولي نين حيکمتي چوخ شاهلاري تيتره د ر. 

  اؤز ديليمدير عرشيده اولدوزلاري دينديرن، 

  دار گؤزلري حيسادت يهريندن ائنديرن. 

  ديليميزين طالعيي اوينوياجاقمي سانيرسان؟ 

  اؤزونون ناحاقليقين منه حاقمي سانيرسان؟ 

  ائي منه منليييمدن ياخين ديليم، 

  بير گون گلر آخارسان دوداقلاردان بال ديليم. 

 

ديليم

دیلیم یالقیز ، دیلیم یالقیزدیر آی قیز

اوغول شیرین ولی قیز بالدیر آی قیز

آماندیر اوزاق دورما تورکون دیلیندن

اوکی اصلین دانار کال قیزدیر آی قیز


بیزیم تورکون دیلی گول دن ظریف دیر

بوتون دیللر دال اولسا بو الیف دیر

ادب ده علم ده هر بیر هونرده

سیز آللاه تورکلره کیم لر حریف دیر


وارلیقدا بوتون وار یوخوموز شعر و غزل دیر

هر بیر غزلی اللی آرا تورکه مثل دیر

من جعفری ام سؤز یازارام تورکو دیلینده

تورکون بالاسی تورک اولا عالمده گؤزل دیر

هوشنگ جعفري

آنامین دوغما دیلی

سوروشوردوم نه ائده ک کئچمیشیمیز یاددا قالا؟

دئدی یات یوخلا بالا

گؤرمه دین میرزه غلام لار اونودوبدور اؤز ائلین؟

ایتیریب دوغما دیلین؟

یئنه سوردوم: اولاجاقمی دُورا اونلار یوخودان؟

دئدی کی ائتمه گومان

یاتیب اونلار یوخوسوندا ایتیریبدی اؤزونو

داناراق ائل سؤزونو.

من دئدیم: ساتدی اؤزون سؤیله نه یی آلدی اولار؟

اؤلسه کوک بیتکی سولار

قورویوب ساخلامادی دوغما دیلین حرمتینی

آتدی اوز غیرتینی

ایتیریب منلییینی تاپدی نه یی میرزه غلام؟

دئدی وار بوردا کلام:

ائلینین غیرتینی چکمه دی یادلا قاتیلیب

ائل ایچینده ن آتیلیب

ساتیلانلار ساتیلارکن گؤزونه تورپاق اولور

باشینا کول توکولور.

من دئدیم: قلب له "ممّدلی" سئویر دوغما ائلین

اوگؤزل تورکجه دیلین

ائل آذربایجانی نین شانلی بناسین قوراجاق

کئشییینده دوراجاق

وطنیم شاد یاشاییب غیرت ایله ذوق آلاجاق

تاریخه ایز سالاجاق

گئت دئنه: میرزه غلام اؤلمه یه جک آذر ائلی

آنامین دوغما دیلی .

ممدلي

                                                            آنا دیلی

 

 تاريخلارا باخديم من فيکير وئرديم

بولبول دن سوروشدوم گول ائي ياخشي دير

 گوزل سئوسه ز نجابتين آختارين

دئمه يين آغ اوزده تئلي ياخشي دير

فرهاد اولا بو داغلاري ها دله

کيپريگين اوخ باغرين باشين ها دله

بد اصيل لر الين وئرر ياد ائله

هر کسه نين طايفاسي- ائلي ياخشي دير

زامبير قشم دوستون چاغير هر آيه

طبيب گلر مرهم سالار يارايه

بايرام آيي دئمک اولماز هر آيه

هر کسه نين آنا ديلي ياخشي دير!

                                                                                                              آشيق قشم

 

                                                                 یاساق                

طالعيمه سن باخ
دوشونجه لريم ياساق
دويغولاريم ياساق
كئچميشدن سوز آچماغيم ياساق
گله جكدن دانيشماغيم ياساق
آتا- بابامين آدين چكمه ييم ياساق!
بيليرسن؟
آنادان دوغولاندان بئله
اوزوم بيلمه يه بيلمه يه
ديل آچيب دانيشديغيم ديلده دانيشماغيمدا ياساق ايميش، ياساق

                                                                                                                 ب.ق.سهند

                                                            

                  

                                                                              

                                          آناديلي شئعيرلري دؤرد صحيفه ده: 

                                                                

                                        ANA DİLİ ŞEİRLƏRİ DÖRD SƏHİFƏDƏ       

 

                                                         2 3 4  1

يازان : عباس ائلچین پنجشنبه 1388/11/08 |