 |
 |
|
|
اونونجو بؤلوم گون دولاندی، آی دولاندی، ایللر گئچدی. آرتیق حئیوانلار تارلاسیندا کلووئر، بئنجامین، قاراقارقا موزئر، بیر ده نئچه دونقوزدان باشقا کیمسه دئوریم گونلرینی آنیمسامیردی. دئوریم چاغینین حئیوانلارینین چوخو اؤلموشدو. مؤریئل اؤلموشدو، بلوبئل، جئسی، پینچئرده اؤلموشدولر. جونزدا اؤلموشدو . او بؤلگهنین اوجقار بیر بوجاغیندا اسریکلرین دینجلیش ائوینده، اجل شرابینی ایچمیشدی. اسنوبال اونوتولموشدو. باکسئری بیر ایکی یاخین یار یولداشیندان باشقا کیمسه تانیمیردی. کلووئر قوجامان بیر قیسراق اولموشدو. گؤزلرینه قارا سو گلیب سورهکلی قول قیچ آغریسیندان سیزیلداییردی. ایکی ایل اؤنجه امکلی اولاجاقدی آنجاق ایندییهدک تارلادا کیمسه گئرچکدن امکلی اولمامیشدی. امکلی حئیوانلارا بؤیوک اوتلاغین بیر بوجاغیندا آیریلاجاق یئرین سؤز ساوی چوخدان ایدی بوشلانیلمیشدی. ناپلئون ایندی اللی باتمانلیق ، اولغون بیر قابان اولموشدو. اسکوئیلرین چوخ کؤکلدیگیندن گؤزلری چتینلیکله گؤرونوردو. تارلادا بیرجه بئنجامین چوخ دگیشمهمیشدی. اونون یالنیز آغیزی بورنو بیر آز بوزارمیشدی.او باکسئر اؤلندن سونرا هئپ دارغین، دالغین گؤرونوردو. دئوریم چاغیندا، حئیوانلارا، تؤرهمهلرینین آرتاجاغینا گؤره وئریلن سؤز گئرچکلشمه سهده، یئنهده تارلادا چوخلو یاراتیق یاشاییردی. دئوریم، گنج حئیوانلارا آغیزدان آغیزا ائشیدیکلری آنلاشیلماز بیر اؤیکو ایدی. آلینمیش حئیوانلار تارلایا گلمهدن اؤنجه بئله شئیلری نه ائشیتمیش نهده گؤرموشدولر. تارلانین ایندی کلووئردن باشقا اوچ آیری آتی وار ایدی. اونلار گئرچکدن دوزگون، چالیشقان، سئویملی آتلار ساییلیردیلار آنجاق چوخ مایماق ایدیلار. اونلارین هئچ بیری الیفبانین اؤیرنمهسینده « ب» حرفیندن ایرهلییه گئدنمهدیلر. اونلار دئوریمه، حئیوانلار ایلکهلرینه گؤره ائشیتدیکلری بوتون سؤزلری، اؤزللیکله آنالیقلای ساییلان کلووئرین سؤزلرینی دوشونمهدن منیمسهییردیلر. آنجاق بو اؤیرهتیلری یاخشیجا قاورادیقلاری بللی دئییلدی. تارلا، ایندی دگیشیب، گلیشیب یاخشی یؤنتیلیردی. پیلینگتوندان آلینان ایکی اکینلیکله تارلانین سینیرلاری بئله گئنیشلنمیشدی. یئل دگیرمانینین سونوندا باشاری ایله باشا چاتمیشدی. ایندی تارلانین بیر کولش دؤین بیرده یونجا بیچن آیقیتی وار ایدی. تارلا ائولرینه یئنی یاپیتلار ائکلنمیشدی. وامپئر اؤزونه بیر فایتون آلمیشدی. یئل دگیرمانی تاخیل اویوتمکله تارلایا یاخشی گلیر ساغلاییردی. قیویل گوجو اورتمک اوچون حئیوانلار قان تر تؤکهرک بیر باشقا یئل دگیرمانی تیکمکده ایدیلر. دئییلنلره گؤره قیویل اورهتَجی بو دگیرمانا قوشولاجاقدی. آرتیق اسنوبالین اؤن گؤردوگو یئددیجهده اوچ گون ایشلهمکدن کیمسه دانیشمیردی. ناپلئون: «بو دوشونجهلر حئیوانلیق ایلکهلرینه آیقیریدیر» دئیه حئیوانلاری اویارمیشدی. اوگئرچک موتلولوغو، چوخ اورهتیب آز توکتمکده بیلیردی. تارلانین وارسیللاشدیغینا قارشین دونقوزلار ایله ایتلردن باشقا بوتون حئیوانلارین یوخسوللاشدیغی گؤزه چارپیردی. بونون بیر ندنیده دونقوزلار ایله ایتلرین سینیرسیزجا بالالامالاری اولا بیلردی. بو یاراتیقلارین ایشلهمهدیکلرینی سؤیلهمک اولمازدی. اونلار اؤزلرینه اؤزگو بیر بیچیمده چالیشیردیلار. اونلار- اسکوئیلرین هئپ سؤیلهدیگی کیمی- تارلانین بیتمز توکنمز گؤزهتیم، دئنهتیم ایشلری ایله اوغراشیردیلار. اسکوئیلر دونقوزلارین چالیشمالاریندان باش چیخارتمایان حئیوانلارا دئییردی: -« دونقوزلار گونده قان ترین ایچینده بلگهلیکلر، یازدیجلار، بیلدیرگهلر، آندیجلار آدلی گیزسل شئیلرین اوزهرینده ایشلهملیدیرلر» بو گیزسل شئیلر، آی بویوجا جیزماقارا ایله دولدورولان اوزون سوو کاغیذلار ایدی. بو کاغیذلار آی باشی اوجاقدا یاندیریلیردی. اسکوئیلر تارلانین موتلولوغو اوچون گرهکلی اولان بو شئیلرین یوکسک اؤنمینی حئیوانلارا آچیقلامیشدی. دوزنقوزلارین یئییب ایچمهلرینین سؤزو یوخویدو آنجاق هلهکیهله ایدی اؤز یئیهجکلرینی اورهته بیلمیردیلر. باشقا حئیوانلارین گئچینهجکلری ائله گئچمیشدهکیلر کیمی ایدی؛ سوره کلی آج قالیردیلار؛ سامان اوستونده یاتیردیلار؛ گؤلمجین سویوندان ایچیردیلر؛ قیشی سویوقدان، یایی ایستیدن، میغمیغا- میلچکدن اینجیییردیلر. یاشلی حئیوانلار هردن بللکلرینین قارانلیق قاتمانلارینی قورتدالایاراق ایندیکی دوروملارینی جونز چاغی ایله توتوشدورماق ایستهییردیلر آنجاق بیر شئی آنیمسامیردیلار. بیر یاندان دا ایکی دؤنمی قارشلاشدیرماق اوچون حئیوانلارین اللرینده دورومون گونو گوندن یاخشیلاشدیغینی گؤسترن اسکوئیلرین آردی کسیلمهین سای ساییشلاریندان باشقا بلگه یوخویدو. حئیوانلار سونوندا بو سورونون چؤزولمز اولدوغونا ایناندیلار؛ بیریانداندا اونلارین باشلاری ایشدن آیینمیردی اوتوروب بو قونو اوزهرینده دوشونسونلر. تکجه بئنجامین اؤتن ایللری بوتون آیرینتیلاری ایله آنیمسادیغینی ایرهلی چکهرک دئییردی: «حئیوانلارین گئچینهجکلری نه بوندان یاخشی اولوب نهده بوندان یاخشی اولاجاق. اومودسوزلوق، سیخینتی حئیوانلارین یاشامینین آیریلماز بیر بؤلومو اولدوغو دوغانین دگیشیلمهین بیر یاساسیدیر.» بونلارلا بئله حئیوانلار هلهده اومودلارینی اوزمهمیشدیلر. اونلار هلهده حئیوانلار تارلاسیندا یاشاماغی اؤزلرینه بیر آیریجالیق ساناراق اوندان قیوانج دویدوردولار. حئیوانلار تارلاسی اؤلکهنین باشا باشیندا حئیوانلارین الی ایله یؤنتیلن بیریجیک تارلا ایدی. بو ان گنج حئیوانلاردان توتوب لاپ اوزاق یئرلردن گتیریلمیش حئیوانلاری بئله شاشیریردی. یاشلی حئیوانلار، توفنگ آتیلاندا، بایراق دالغالاندیرلاندا دؤشلرینی قاباغا وئرهرک ایگیدلیک چاغلاریندان ، جونزو قووان گونلردن ، یئددی بویروغو یازان گونلردن ، اینسانلارین باسقیسینی سیندیران گونلردن دانیشیردیلار.اونلار هلهده اسکی دوشلرینی اونوتمامیشدیلار. اونلار هلهده قوجا مئیجئرین اینسانلارین آیاغی یاشیل تارلالاردان کسیلینجه قورولاجاق اینگیلیس حئیوانلاری جومهوروسونا اینانیردیلار. اونلار هلهده او گونون ائر-گئج گلهجگینه، اؤزلری گؤرمهسهده اوشاقلارینین تانیق اولاجاغینا آرخایین ایدیلار. بونا گؤره اونلار اینگیلیس حئیوانلاری ماهنیسینی گیزلیجه میزیلداییردیلار. حئیوانلارین هامیسی ماهنینی اؤیرنمیشدیلر. آنجاق اونو اوجا سسله اوخوماقدان قورخوردولار. حئیوانلار گئچینهجکلرینین آغیر اولدوغونو، آماجلارینین گئرچکلشمهدیگینی بیلیردیلر آنجاق بونونلا یاناشی باشقا حئیوانلارکیمی اولمادیقلارینی دا آنلاییردیلار. اونلار آج اولسالاردا آرتیق امکلری بیر سورو قولدور اینسانی دویورموردو. اونلار چوخ ایشلهسهلرده اؤزلرینه ایشلهییردیلر. اونلارین آراسیندا کیمسه ایکی آیاق اوسته یئریمیردی. اونلارین آراسیندا کیمسه باشقاسینین آغاسی دئییلدی. بوتون حئیوانلار ائشید ایدیلر. یایین ایلک گونلرینین بیرینده اسکوئیلر قویونلاری دالیسیجا سالاراق تارلانین اوجقار بیر بوجاغینا، قایین آغاجلاری مئشهسینه آپاردی. قویونلار آخشامادک آغاجلارین یاپراقلاریندان یئدیلر. قاش قارالاندا اسکوئیلر تارلا ائوینه قاییدارکن هاوانین ایستی اولدوغونا گؤره قویونلاردان ایستهدی اورادا قالسینلار. قویونلار یئددی گون اورادا قالدیلار. بو سورهده اسکوئیلردن باشقا کیمسه اونلاری گؤرموردو. او گونونون چوخونو قویونلارلا گئچیریردی. او دینج بیر یئرده قویونلارا یئنی بیر ماهنی اؤیرتدگینی سؤیلهییردی. قویونلار آغیللارینا قاییدیقدان بیر نئچه گون سونرا حئیوانلار ایشدن تارلا ائولرینه دؤنرکن آولودان گلن قورخونج کیشنرتی سسیندن هویوخدولار. سس کلووئرین سسی ایدی. او یئنه کیشنهدی. آولویا چاتدیقدا کلووئرین گؤرنلرینی اونلاردا گؤردولر. بیر دونقوز ایکی آیاق اوستونده یئریییردی. دونقوز اسکوئیلرین اؤزو ایدی. او بیر آز باجاریقسیز گؤرونوردو؛ دئیهسن آغیر گؤودهسینی بو بیچیمده ترپتمگه آلیشمامیشدی. بونونلا بئله دنگهسینی قورویاراق آولودا دولانیردی. حئیوانلار ماتدیم-ماتدیم بو گؤرونتویه باخدیقدا تارلا ائوینین قاپیسیندان آرخا آیاقلاری اوستونده یئریین بیر سورو دونقوز باییرا چیخدی. اونلارین بیر بؤلوگو باشقالاریندان یاخشیراق یورویوردولر. بیر ایکیسی ایسه چتینلیکله دوروش گتیریب قولتوق آغاجینا سؤیکنمیش کیمی گؤرونوردولر. دونقوزلار آولویا آخیشاراق دولانماغا باشلادیلار. بو آرادا کؤپکلرین قورخونج اولاشماسی ایله قارا خوروزون بانلاما سسی ناپلئون گلدیگی بیلدیردی. ناپلئون دیم-دیک آغالار کیمی دیشارییا چیخدی.او تویناغیندا بیر قامچی داشییر؛ کیچیمسهییجی باخیشلارینی چئورده گزدیریردی. کؤپکلر دؤرد یانیندا وورنوخوردولار. بوغوجو بیر سوسقونلوق هر یانی بورودو. هویوخموش حئیوانلار بیربیرلرینه قیسیلاشاراق قورخو ایله سیرا-سیرا گزیشن دونقوزلار گؤز تیکدیلر. سانکی ائورن باشلارینا کؤچموشدو. آز سونرا، ایللر بویو جینقیرلارینی چیخارتماماغا آلیشان حئیوانلار کوووشمهدن چیخدیلار. اونلار کؤپکلردن قورخدوقلارینی اونوداراق آغیزلارینی دیلنمگه آچدیقدا قویونلار قولاق باتیریجی سسلری ایله ملشمگه باشلادیلار: «دؤرد آیاق یاخشی، ایکی آیاق یاخیشراق. دؤرد آیاق یاخشی.....» قویونلارین بئش دقیقهلیک آرالیقسیز ملشمهلری بیتدیکده دونقوزلارین تارلا ائوینه دؤندوکلری اوچون آرتیق دیللنیش گیرهوسی حئیوانلارین الیندن چیخمیشدی. بئنجامین چیگنینین بورونلاندیغینی دویدو. دؤندوگونده کلووئری گؤردو. گؤزلری هر زامانکیندان بتر بولانلیق گؤرونوردو. او قونوشمادان بئنجامینین یئلهسیندن یاپیشاراق بؤیوک آمبارین دیبینه، یئددی بویروق یازیلان یئره چکدی. اونلار گؤزلرینی قارالانمیش دووارین اوزهرینده یازیلان آغ یازیلارا تیکدیلر. سونوندا کلووئر دیله گلدی: « بئنجامین! گؤزلریمین ایشیغی آزالدیغیندان دوواردا یازیلانلاری اوخویا بیلمیرم؛ دوغروسونو ایستهسن گنج ایکن بئله اورادا نه یازیلدیغینی اوخویا بیلنمزدیم آنجاق ایندی منه ائله گلیر سانکی دوواردا یازیلانلار بیرآز دگیشیب. باخ گؤر یئددی بویروق یئرینده دیرمی؟» بئنجامین ایلک کز اولاراق قوراللارینی سیندیریب دوواردا یازیلانلاری اوخودو. بویوروقلار یئرینده ایدی یالنیز بیری دگیشمیشدی: «بوتون حئیوانلار ائشیتدیرلر آنجاق بیر سوروسو باشقالاریندان ائشیدراقدیرلار.» او گوندن سونرا تارلا ایشلرینی گؤزتلهین دونقوزلارین تویناغینداکی قامچیلار داها آنلاشیلماز گؤرونموردو. حئیوانلار آرتیق دونقوزلارین رادیو آلمالاریندان، تئلفون چکدیرهجکلریندن، چئشیدلی گوندهلیکلره، درگیلره آلاغان اولدوقلاریندان شاشیرمیردیلار. حئیوانلار آرتیق ناپلئونون چوبوق چکهرک باغچادا گزمهسیندن یا دونقوزلارین بای جونزون پالتارلارینی دولابدان چیخاردیب گئیمهسیندن اورکموردولر. ناپلئون اؤزو سودگونلری بای جونزون قارا کوت- شالواری ایله گؤن باشماقلارینی گئیهرک بایان جونزون ایپک پالتارلارینی گئیمیش سئوگیلیسی ایله قول قولا باییرا چیخیردی. بیرگون، گون اورتا چاغی بیر نئچه قایتون تارلایا گلدی. بونلار تارلانی گزمگه ، گؤرمگه گلن قونشو تارلالاردان چاغیریلمیش قوناقلار ایدی. اونلار تارلانی اؤزللیکله یئل دگیرمانینی چوخ بگندیلر. قوناقلار گلنده حئیوانلار یئرکؤکولری آلاق ائتمکدهایدیلر. اونلار باشلارینی آشاغی سالیب جاندان اورکدن ایشلهییرکن دونقوزلاردان می چوخراق قورخدوقلارینی یوخسا گؤروشچولردن می؟ دئیه دوشونوردولر. آخشام چاغی، تارلا ائویندن چالیب اوخوما سسلری یوکسلدی. حئیوانلار بیردن بیره بو قارماقاریشق سسلردن برک ماراقلاندیلار. گؤرهسن نه اولوب؟ دونقوزلار ایله اینسانلار ایلک کز اولاراق ائشیدجه بیربیرلری ایله بولوشوردولار. حئیوانلار اویوشما ایچینده باغچایا ساری آخیشدیلار. باغچانین قاپیسیندا بیر آز دوراقسانما اولدو. حئیوانلار قورخوردولار ایچرییه گیرسینلر.کلووئر ایچرییه سوخولونجا حئیوانلار قوشقودان چیخیب آیاق اوجوندا ائوه گئچدیلر.اوجا بویلولار یئمک اوتاغینین آچیشقاسیندان ایچرییه بویلاندیلار. آلتی کیشی، آلتی دونقوز بیرماسانین چئورهسینده اوتورموشدولار. ماسانین باشیندا ناپلئون اگلشمیشدی. دونقوزلارین یئرلرینین یوموشاق اولدوغو اوزاقدان بللی ایدی. آیاقداشلارین باشلاری قاراخال اویونونا قیزیشمیشدی. بیر هاویردان اویوندان ال چکدیلر. دئیهسن بوغازلارینی یاشلاتماق ایستهییردیلر. بؤیوک بیر بایداق الدن اله گزهرک بارداقلاری آرپا سویو ایله دولدوردو. کیمسه آچیشقادان باخان ماراقلی اوزلری اؤزنسهمیردی. فاکسفود تارلاسینین آغاسی بارداق الینده آیاغا قالخاراق دئدی: -« آغالار! بارداقلارینیزی قوناقلارین ساغلیغینا قالدیرمادان اؤنجه بیر نئچه سؤز سیزلره سؤیلهملییم. منجه بو اوزون سورن گوونسیزلیک، آنلاشمازلیق چاغینین سونا ائرمهسی بو گون بیزیم اوچون گئرچکدن سئویندیریجی بیر اولایدیر. بیر زامانلار حئیوانلار تارلاسینا دوشمنلیک گؤزو ایله دئمهسکده قوشقو گؤزو ایله باخیلیردی. بو باخیشلار یانلیش دوشونجهلر تؤرهدهرک آجی اولایلارا ندن اولدو. دونقوزلارین تارلا یؤنتمهسی اولاغاندیشی گؤستریلهرک قونشو تارلالارا کؤتو ائتگی بوراخاجاغیندان دانیشیلدی. اکینچیلرین چوخو دوشونوب داشینمادان بؤلگهده اؤزباشینالیغین، دوزنسیزلیگین یاییلاجاغیندان قوشقولانیردیلار. اونلار حئیوانلارینین هابئله ایشچیلرینین ائتکیلنمهسیندن قورخوب سینیرلهنیردیلر. آنجاق بو گون بوتون قارامسارلیقلارین یئرسیز اولدوغو آنلاشیلدی. بیز بو گون حئیوانلار تارلاسینین قاریش قاریشنی گزهرک باشقا تارلالارا اؤرنک اولمالی یئنی یؤنتملی، سیخیدوزنلی،گلیشمیش بیر تارلا ایله قارشیلاشدیق. منجه بوراداکی قارا حئیوانلار بیزیمکیلردن چوخراق ایشلهییب آزراق یئییرلر. بیز بو دئنمهلری تارلالاریمیزا قاییدینجا اؤز حئیوانلاریمیزین اوزهرینده اویغولامالیییق.» پیلینگتون سؤزلرینین سونوندا حئیوانلار تارلاسی ایله قونشو تارلالار آراسیندا یاشاییب یاشایاجاق دوستجا دویغولارا توخوناراق ائکلهدی: -« دونقوزلار ایله اینسانلارین آراسیندا چیخار چلیشکیسی یوخدور، اولمامالی دیردا. اوغراشدیغیمیز بوتون سورونلار هر یئرده بیردیر: ایشچی امگی. اؤیله دئییلمی؟» بورادا پیلینگتون بیر گولمهجه سؤیلهیهجکمیش کیمی گؤرونوردو آنجاق چوخ جوشقولاندیغیندان سؤزلری بوغازیندا تیخیلدی قالدی. او بیر آز قیزاریب بوزاراندان سونرا اوزونو دونقوزلارا توتاراق دئدی : -« سیزین سورنونوز قارا حئیوانلاردیر بیزیمکی ایسه قارا ایشچیلر.» پیلینگتونون بوسؤزوندن هامی گولوشدولر. او دونقوزلاری، حئیوانلارینین آز یئییب چوخ ایشله دیکلری اوچون، سیرتیق بار گتیریلمهدیکلری اوچون بیر داها قوتلاییب « ایندی ایسه بارداقلاریمیزی حئیوانلار تارلاسینین ساغلیغینا قالدیرالیم.» دئیه سوزلرینی بیتیردی. بورادا ناپلئون آیاغا قالخیب هئپ اولدوغو کیمی سؤزونو اوزاتمادان آنلاشمازلیق چاغینین باشا گلمهسیندن موتلولوق دویدوغونو دیله گتیرهرک دئدی: -« اوزون سوره بیزیم تانینمیش آزغین دوشمنیمیز، سانکی منله امکداشلاریم قونشو تارلالاردا پوزغونلوق چیخارتماق دوشونجه سیندهییک دئیه یالانلار اویدورموشدو. بوندان یئکه یالان اولمازدی. بیزیم دیلگیمیز ایندیده گئچمیشدهده ، قونشو تارلالارلا باریش ایچینده یاشاماق هابئله ایکی باشلی آلیش وئریش ایلیشکیلری قورماق اولوب.» ناپلئون سؤزلرینین آردیندا باشچیلیق ائتدیگی تارلانین اورتاقسال بیر تارلا اولوب بوتون دونقوزلارین ایش بیرلیگی ایله یؤنتیلدیگینی آچیقلایاراق ائکلهدی: -«من اسکی آنلاشمازلیقلاردان بیر ایزین قالمادیغینا اینانیرام بونونلا بئله آرتیقراق گوونج ساغلاماق اوچون بو یاخینلاردا تارلانین گونجل ایشلرینده بیر پارا دگیشیکلیکلر یاراتمیشام. اسکیدن بری تارلا حئیوانلاری گولونج بیر تؤرهیه گؤره بیربیرلرینی یولداش دئیه سسلهییردیلر. بو ایش دایاندیریلیب. ائلجهده قایناغی بللی اولمایان باشقا بیر تؤرهیه گؤره اونلار سود گونلری باغچانین دووارینا چیویلنمیش بیر قافاتاسینین قارشیسندان سان گئچیردیلر. بو ایشه ایسه یاساقلانیب قافاتاسی دا قویلانیب دیر. سئویملی قوناقلاریمیز تارلانی گزه رکن باخسایدیلار بایراغیمیزین اوزهرینده اولان بوینوز-تویناغین سیلیندیگین گؤرهجکدیلر. بوندان بئله تارلانین بایراغی یالنیز یاشیل رنگده اولاجاق. من بورادا بای پیلینگتونون گؤزل دئمهجینه بیر اللشدیریم وار. بای پیلینگتون دانیشیغیندا سورهکلی اولاراق حئیوانلار تارلاسی آدینی چکیردی. قوشقوسوز سایین دوستوموز حئیوانلار تارلاسی آدینین اورتادان قالدیریلدیغینی بیلمیرلر- ناپلئون بونو ایلک کز اولاراق بورادا بیلدیردی- بوندان بئله منیم اینامیجا تارلا اؤز گئرچک آدی، مانور تارلاسی آدی ایله سسلنملی دیر.» ناپلئون سؤزلرینین سونوندا دئدی: « ایندیسه ایچیریک سیزین ساغلیغینیزا، بیر باشقا دئییشله، ایچیریک مانور تارلاسینین باشاریلاری ساغلیغینا» یئنه بارداقلار دولوب بوشالدی. یئنه اسریکسل چیغیریشلار ، باغیریشلار گؤیه یوکسلدی. بو گؤرونتویه باییردان گؤز تیکن حئیوانلارا ائله گلیردی سانکی اورادا آنلاشیلماز بیر شئیلر باش وئرمکده دیر. دونقوزلارین اوزونده نه ایسه بیر شئیلر دگیشمکده ایدی. کلووئر دومانلی گؤزلرینی بیر اوزدن باشقا اوزه دولاندیریردی. دونقوزلارین کیمینین بئش بوخاغی کیمینین دؤرد بوخاغی کیمینین ایسه اوچ بوخاغی وارایدی. اوزلرده اریییب دگیشن نه ایدی؟ اؤیونمه-سؤیونمه سونا ائرینجه آیاقداشلار یاریمچیلیق قالمیش اویونلارینی یئنیدن اویناماغا باشلادیلار. حئیوانلار بونو گؤرهلی سسسیزجه گئری دؤندولر. اونلار ییرمی اوتوز آددیم اوزاقلاشمامیش تارلا ائویندن اوجالان چیغیریشما سسینه آیاق ساخلادیلار. تلهسیک دؤنوب آچیشقانین قاباغینا قاچدیلار. ایچریده آغیز قاوقاسی قیزیشمیشدی. اونلار یوموروقلارینی ماسایا تاپداییر چیغیریشیر، قوشقو دولو گؤزلرله باخیشیر، بیربیرلرینین سؤزلرینی قیزغینجا یالانلاییردیلار. ناپلئون ایله پیلینگتون ایکیسیده بیر آندا قارا خال چیخارتمیشدیلار. چیغیریشان اون ایکی سس بیربیرینه بنزهییردی. آرتیق ایندی دونقوزلارین اوزلرینده نهیین دگیشدیگی سورولموردو. باییرداکی یاراتیقلار بیر دونقوزلار بیر اینسانلارا باخدیلار. سونرا دؤنوب یئنه بیر اینسانلارا بیرده دونقوزلارا باخدیلار. آرتیق اونلاری بیربیریندن سئچمک اولموردو. سون پاییز 1386 عباس ائلچین
|
||
