 |
 |
|
|
بئشینجی بؤلوم قیش گلدیکده، مولی گونو گوندن آرتیقراق بیخدیریجی اولوردو. « یوخویا قالمیشدیم » دئیه ایش باشینا گئج گلیردی. یئییب ایچمهسینین یاخشی اولدوغونا باخمایاراق آنلاشیلماز آغریلاردان سیزلداییردی. هردن بیر باهانا ایله ایشدن ال چکهرک گؤلمجین باشینا گئدیب سارساقجاسینا سوداکی یانسیماسینا گؤز تیکیردی. بونلاردان اؤنملیسی اونا گؤره سؤیلهنن سؤیلهنتیلر ایدی. بیر گون مولی، آولودا سکیره-سکیره قاچیب اویناقلایارکن کلووئر اونایاخینلاشیب دئدی: -«« مولی سنینله قونوشمالییام. سحر چاغی سنی فوکسفود تارلاسینین آویریندا، چیغلارین اوستوندن بویلانارکن گؤردوم. پیلینگتونلو بیر کیشی چیغین اوتاییندا دورموشدو.آرانین چوخ اولدوغونا باخمایاراق من بو ایکی گؤزومله گؤردوم او سنین بورنونو تومارلایا- تومارلایا سنینله دانیشیردی.بونلارین آنلامی ندیر؟» - « یوخ ، او ائله یاپمادی، من دئییلدیم! بو دوغرو دئییل!» مولی قیوریلیب آچیلاراق آیاغینی یئره تاپدایا- تاپدایا چیغیردی. -« مولی اوزومه باخ . سن آند ایچیرسنمی آدام سنین بورنونو اوخشامادی؟» -« بو دوغرو دئییل! »- مولی یئنه قیشقیردی آنجاق کلووئرین اوزونه باخمادی.آز سونرا او دؤرد نالا قاچیب تارلانین ایچینده گؤزدن ایتدی. کلووئرین ایچینه قورد دوشدو. کیمسهیه بیر سؤز دئمهدن مولینین آغیلینا گئدیب آخیرینداکی سامانلاری اندر- دؤندر ائدهرک آلتیندا بیر ییغین دادلیجا ایله نئچه رنگلی شیریق بولدو. اوچ گون سونرا مولی یوخ اولدو. گونلر گئچسهده کیمسه اونون هارادا اولدوغونو بیلمیردی. سونوندا گؤیرچینلر سالیغینی ویلینگتونون یان یؤورهسینده توتدولار. او آلا- بولا بویانمیش بیر فایتونا قوشولوب چاخیر ائوینین قارشیسیندا دایانمیشدی. چاخیرچیلارا بنزهین قیرمیزیبنیز بیر کیشی اونا دادلیجا وئرهرک بورنونو اوخشاییردی. مولی یئنیجه قاشاولانیب یئلهسینه آل شیریق تاخیلمیشدی. گؤیرچینلرین دئدیگینه گؤره او موتلو گؤرونوردو. بوندان بئله اونون آدینی چکن اولمادی. چیللهنین گلیشی ایله هاوالار سرتلشدی. یئر دمیر کیمی دونوب گؤرولهسی بیر ایش یوخویدو. نئچه ییغینجاق بؤیوک آمباردا گئچیریلدی. دونقوزلار گلن اوچ آیدا گؤرولهجک ایشلر اوزهرینده اوغراشیردیلار. دونقوزلارین هوشلو- باشلی اولدوقلارینا گؤره حئیوانلار آنلاشاراق بیر پارا قوشوللارلا تارلانین یؤنتیم- دئنتیم ایشلرینی اونلارا تاپشیرمیشدیلار. اونلارین وئردیکلری قرارلار گرهک اوی بیرلیگی ایله اونایلاناردی. اسنوبال ایله ناپلئون بوش دارتیشمالاری اولماسایدی بو آنلاشی یئترینجه یارارلی اولاجاق ایدی. اونلارین بیر سورون اوزهرینده اویوشمالاری اولاناقسیز ایدی. بیریسی اکینلیکده آرپا اکمگی اؤنرسهایدی قوشقوسوز او بیریسی بوغدا اکمگی ایرهلی چکهجکدی. بیری بیر یئری یالنیز کلم اکمک اوچون اویغون گؤرسه ایدی باشقاسی اورانین یئر کؤکو اکمکدن باشقا بیر ایشه یارامایاجاغینی سؤیلهیهجکدی. بونلارین یانداشلاری آراسیندا ایسه قیزغین دارتیشمالار گئدیردی. ییغینجاقلاردا اسنوبال آخیجی دانیشیغی ایله چوخونلوغون اویونو قازانا بیلیردی. ناپلئون ایسه، ییغینجاقلار آراسی حئیوانلارین اؤزللیکله قویونلارین آراسیندا دولاشاراق اؤزونه یانداش ییغماقدا باشاریلی ایدی. بیر سوره سونرا قویونلار یئرلی- یئرسیز ملشمهلری ایله ییغیینجاقلاری بیربیرینه وورماغی اؤیرندیلر. اونلار، اسنوبالین دانیشیغینین اؤنملی یئرلرینده « دؤرد آیاق یاخشی، ایکی آیاق یامان» نی ملشهرک اونون سؤزلرینی آغزیندا قویوردولار. اسنوبال ، تارلا ائویندن تاپیلمیش "یئنی اکینچیلیک ایله داوارچیلیغا دوغرو" درگیسینین گئچمیش ساییلارینی اوخویاراق، بیلگینجهسینه، دوزهلهجک سو یوللاریندان، آیاق یوللاریندان، سیلولاردان دانیشیردی. اونون اوستونده ایشلهدیگی بیر بوروشوق دوزگهده؛ حئیوانلار، گونده تارلانین دگیشیک یئرلرینده اؤزلرینی یونگوللتمکله پئهین داشیما ایشینی آزالتاجاقدیلار. ناپلئون اؤزونه اؤزگو بیر گؤرونجهسی یوخویدو. او اسنوبالین ایشلرینی واختی سورتوب اؤزونو ساریماق بیلیردی. اونلارین آنلاشمازلیقلارینین ان آجیسی دوزه لهجک یئل دگیرمانینین اوستونده گئدیردی. اوتلاقداکی تپهجیک، تارلانین یاپیتلارینا یاخین اولان، ان یوکسک یئر ایدی. اسنوبال آلانی گوزدن گئچیرتدیکدن سونرا، اورانی تارلانین قیویل گوجونو ساغلایاجاق یئل دگیرمانینین تیکیلمهسی اوچون ان اویغون یئر اولدوغونو بیلدیردی. اورهتیلهجک قیویللا، آغیللارین ایشیغی، سرینلیگی، ایستیلیگی ساغلانیب اوت دوغرایان ، کولش دوین، یونجا بیچن، سودساغان کیمی آیقیتلار ایسه ایشه دوشهجکدی. تارلانین اسکی بیچیملی اولدوغونا گوره، حئیوانلار ایندیهدک بئله بیر شئیلر نه ائشیتمیش نهده گورموشدولر. اونا گوره شاشقینلیقلا اسنوبالین سویلهدیکلرینه قولاق آسیردیلار. اسنوبال درگیلردهکی دوشسل آیقیتلارین چیزگیلرینی حئیوانلارا گؤسترهرک دئییردی: -« سیزلر آیین-شایین اوتلاقدا اوتلایاندا یاخود آلقیلارینیزی گلیشدیرمک اوچون یازیب اوخوماقدا اولاندا ، بو آیقیتلار سیزین یئرینیزده چالیشاجاقلار.» بئش اون گونون ایچینده، اسنوبالین ایشلهدیگی یئل دگیرمانینین چیزگهلری سونوجلاندیردی. اسنوبال گرهکن بیلگیلری، جونزون " ائوده گؤروله بیلن مین بیر یارارلی ایش" ، " کرپیچ هؤرمه " ، " ایلکللر اوچون قیویل گوجو" بیتیکلریندن آلمیشدی. اسنوبال آراشدیرمالارینی، پورزسوز آغاج دؤشمهسی چیزگی چکمگه ال وئریشلی اولان؛ گئچمیشده جوجه چیخارتماق اوچون قوللانیلان ائوجیکده یاپیردی. اسنوبال گونون چوخونو ائوجیکده گئچیریردی. او آچیلی بیتیکلر دورد یانیندا، بیر پارچا گچ تویناغیندا، سورهکلی وار- گئت ائدهرک جیزیغی جیزیق دالیجا چکیر هردن ایسه دایانیب سئوینجیندن چیغلیق قوپاریردی. دؤشهمهنین یاریسیندان چوخونو توتان چیزگهلر گئت گئده گلیشیب باشقا حئیوانلارا آنلاشیلماز آنجاق ائتگیلهییجی اولان بیر ییغین چارخ ایله قولا دؤنوشوردو. حئیوانلار گونده آزی بیر یول گلیب اسنوبالین چیزدیقلارینا باخیردیلار. تویوقلار ایله اؤردکلر چیزگهلری آیاقلاماسینلار دئیه قاپینین آغزیندان بویلانیردیلار. یاخینا گلمهین بیرجه ناپلئون ایدی . او باشلانغیجدان یئل دگیرمانینا قارشی چیخدیغینی بیلدیرمیشدی. او بیرگون گؤزلهنیلمهدن چیزگهلری یوخلاماغا گلدی. او آغیر- آغیر چیزگهلرین باشینا دولاناراق بوتون آیرینتلاری یاخیندان بیر ایکی یول اییلهیه- اییلهیه گؤزدن گئچیردیکدن سونرا بیر آز دایانیب گؤز اوجو ایله اونلارا باخاراق دوشونجهیه دالدی. بیردن بیره او دینمز- ائلهمز آیاغینی قالدیریب چیزگهلرین اوستونه ایشهمگه باشلادی. ایشی بیتینجه یئنه بیر سؤز سؤیلهمهدن دیشارییا چیخدی. تارلا، یئل دگیرمانی اوستونده دریندن ایکییه بؤلونموشدو. اسنوبال دگیرمان تیکمهنین چتین بیر ایش اولدوغونو دانمیردی. بو ایش اوچون اونجه اوجاقدان داش چیخاریلیب دووار هؤرولمهلی ایدی. بونون آردینجا یئل دگیرمانینین یئلکنی دوزلمهلی ایدی سونوندا ایسه اورهتج ایله کابلین آلماسی گرهکیردی. اسنوبال بونلارین نئجه ساغلاناجاغینا گؤره بیر شئی سؤیلهمیردی آنجاق اونون بیر ایلین ایچینده بیتهجگینی ساوونوردو. بو یاندان اسنوبال: « یئل دگیرمانینین یولا دوشمهسیله حئیوانلارین ایشلهمهسی یئددیجهده اوچ گونه آزالاجاق.»دئییردی. اویاندان ناپلئون: « ایندیلیکده تارلانین ان بؤیوک گرهکسینیمی اورهتیلهجک یئیهجگین چوخالماسیدیر. واخت یئل دگیرمانی تیکمکله سورتولورسه هامی آجلیقدان اؤلهجکدیر.» دئییردی. بئلهلیکله اسنوبال ایله ناپلئونون یانداشلاری "آز ایش" ایله "توخ قارین" آدلی ایکی بؤلوک اولوشدوردولار. بئنجامین بؤلوکلره قاتیلمایان بیرجه حئیوان ایدی. اونون اینامیجا، نه یئیهجک چوخالاجاق ایدی نهده دگیرمان ایشی آزالتاجاق ایدی. دگیرمانین اولوب اولماماسی حئیوانلارین دوروموندا بیر دگیشیکلیک یاراتمایاجاق ایدی. یئل دگیرمانینین اوستونده گئدن دارتیشمالارلا یاناشی بیر باشقا سورون، تارلانین ساوونماسی ایدی. آداملارین اینکلیک ساواشیندا یئنیلمهلرینه باخمایاراق تارلانی گئری آلیب جونزو قایتارماق اوچون سرت بیر گیریشیمه قالخیشاجاقلاری اولاسیایدی. آداملارین یئنیلگیسینین چاوی بؤلگهده یاییلاندان بری، قونشو تارلالارداکی حئیوانلار ، گؤرولمهدیک بیر بیجیمده قودورغانلاشمیشدیلار. بو ندنله آداملارین ال- ال اوستونه قویوب دورمایاجاقلاری سئزیلمیشدیر. بو قونو اوزهرینده یئنه اسنوبال ایله ناپلئون آنلاشمازلیق ایچینده ایدیلر. ناپلئون دئییردی: « اؤزوموزو قوروماق اوچون بیرجه یولوموز توفنگ اله آلیب ساواشماقدیر.» اسنوبال دئییردی: « بیز باشقا تارلالارداکی حئیوانلاری آیاقلاندیرماق اوچون داها چوخ ساوجی گؤیرچین گؤندرمهلیییک.» بو چیغیریردی: « بیز اؤزوموزو ساوونماساق یئنیلهجهییک». او باغیریردی: « دئوریم بوتون یئرلرده باش وئرسه ساوونماغا گرهک قالمایاجاق». حئیوانلار اؤنجه ناپلئونا سونرا اسنوبالا باخیردیلار آنجاق هانکیسینین دوغرو سؤیلهدیگینی آنلامیردیلار. دوغروسو، اونلار، چوخراق دانیشماقدا اولانین سؤزلرینی دوغرو بولوردولار. اسنوبالین چیزگهلری سونوندا بوتونلشدی. سود گونو ییغینجاغیندا، یئل دگیرمانینین تیکیلیب تیکلمهمهسی اویلاناجاقدی. اویلاما گونو، حئیوانلار بؤیوک آمباردا توپلاشدیقدا، اسنوبال آیاغا قالخیب قویونلارین آرا- سیرا ملشمهلرینه باخمایاراق یئل دگیرمانینین گرهکلی اولماسینی یاخشیجا قانیتلادی. سیرا ناپلئونا گلینجه او دیکلهنیب چوخ یوموشاقجا، یئل دگیرمانینین آنلامسیز لیغینی وورغولایاراق بوتون حئیوانلاردان اونا اوی وئرمهسینی ایستهدیکدن سونرا چابوق یئرینده اوتوردو. اونون باشقالارینی ائتگیلهمگه اؤنم وئرمهدیگی قیساجیق قونوشماسیندان بللی ایدی. اسنوبال بونو گؤرهلی یئنه یئریندن سیچراییب ملشمگه باشلایان قویونلارین باشینا چیمخیراراق، آشقین داشقینلیقلا یئل دگیرمانینین یارارلارینی سایماغا باشلادی. اسنوبالین یاتیملی دانیشیغی، از اؤنجه اوی باخیمیندان دوز ایکییه بؤلونموش حئیوانلاری قوشقودان چیخارتدی. اسنوبال اوستالیقلا، تارلادا آغیر ایشین حئیوانلارین سیرتیندان گؤتورولهجک گونون گؤرونتوسونو چکدی.اونون دوشلری آرتیق کولشدؤین ایله اوتدوغرایان کیمی آراجلاردان دا اؤتهیه گئتدی. اونون دئدیگینه گؤره: قیویل گوجو ؛ ساپان، تاپان، اکن، بیچن، ییغان آیقیتلارینی چالیشدیرماقدان باشقا بوتون آغیللاردا قیشی-یایی، ایستی-سویوق سو ساغلایاجاق ایدی. آرتیق اویلامانین سونوجو ایندیدن بللی ایدی. اسنوبالین سؤیلهوی بیتینجه ناپلئون آیاغا قالخیب اونا ترس-ترس باخاراق ایندییهدک ائشیدیلمهدیک بیر یابانجیل قیها چکدی. بیردن باییردان قورخونج هوروشمه سسلری دویولدو. آز سونرا، دوققوز بوروش چنگللی هئیوهره کؤپک آمبارین ایچینه آتلانیب دوز اسنوبالین اوستونه یومولدولار. اسنوبال ال- آیاق ائلهییب یئریندن سیچراماسایدی کسینلیکله قاپیلاجاق ایدی. بیر گوز قیرپیمیندا ، او اؤزنو قاپیدان ائشیگه تولازلادی. کؤپکلر اونون دالیسیجا دوشدولر. قورخوب هویوخموش حئیوانلار، قاپینین آستاناسینا ییغیشاراق قووالامایا گؤز تیکدیلر. اسنوبال، آنا یولا اولاشان جیغیردا قاچماقدا ایدی. او بیر دونقوزون قاچا بیلهجگی توودا قاچیردی. کؤپکلر گئتدیکجه اونون توپوقلارینا یاخیلاشیردیلار. بیردن اونون آیاغی قایدی. حئیوانلار گؤزلرینی یوماراق ایشین بیتدیگینی ساندیلار. آنجاق او اؤزونو ییغیشدیریب اؤنجهکیندن توواراق قاچماغا باشلادی. کؤپکلر یئنه اونا چاتماقدایدیلار. کؤپکلرین بیری اسنوبالین قویروغوندان توتدو آنجاق او دارتیناراق اونو قورتارا بیلدی. ائنینده-سونوندا او اؤزونو چیغداکی بیر دلیگه سوخوب گؤزلردن ایتدی. حئیوانلار بونوگؤرونجه سسسیزجه آمبارا گئری دؤندولر. چوخ چکمهدی، کؤپکلر هوروشه-هوروشه قایتدیلار. کیمسه بو یاراتیقلارین هاردان گلدیگینی بیلمیردی. آز سونرا سورون چؤزولدو. بونلار، ناپلئونون انیکلیکده آنالاریندان آییریب بویوتموش قوچوقلار ایدی. اونلار یاشلاریندان داها ایری گؤرونوردولر. اونلارین قورخونج گؤرکملری قوردلارا بنزهییردی. کؤپکلر ناپلئونون باشینا ییغیشاراق، گئچمیشده ایتلرین بای جونزا قویروق بولادیقلاری کیمی، اونا قویروق بولاماغا باشلادیلار. ناپلئون کؤپکلرله بیرگه، قوجا مئیجرین سؤیلهو یاپدیغی سامان قالدیریما چیخاراق بوندان بئله سود گونلرینده، ییغینجاقلارین گئچیریلمهیهجگینی بیلدیردی. او بو ایشلری بوشونا واخت سورتمک آدلاندیراراق آرتیردی؛ گلهجکده تارلا ایشلری ایله ایلگیلی بوتون سورونلار اونون باشچیلیغی آلتیندا، دونقوزلاردان اولوشان اؤزل بیر قورولدا چؤزولهجکدیر. حئیوانلار سود گونلری یالنیز بایراغا سایغی دوروشو اوچون توپلاشیب اینگیلیس حئیوانلاری ماهنیسینی اوخودوقدان سونرا گؤرولهسی ایشلرینین بویروغونو دارتیشمادان آلیب داغیلاجاقلار. اسنوبالین قووولماسیندان سارسیلان حئیوانلار بو بیلدیریش ایله لاپ قورخویا دوشدولر. اونلارین دارتیشما حاقلاری اولسایدی کسینلیکله دیللهنهجک ایدیلر. بو آرادا باکسئر بئله آنلاشیلمازجاسینا داریخدی. او قوللاقلارینی شوشلهییب یئلهسینی بیر ایکی یول سیلکهلهدی، بیرشئی سؤیلهمک ایستهییردی؛ آنجاق عاغلینا بیر شئی چاتمیردی. تارلانین دونقوزلارینین آراسیندا دیللی-باشلی اولانلارین سایی آز دئییلدیر. اؤن جرگهده اوتورموش دؤرد پوتا چوشقا، دیللنیشلرینی بیلدیرمک اوچون چیغیر-باغیر سالاراق یئرلریندن داشلانیب هئپ بیرلیکده دونقولداماغا باشلادیلار؛ آنجاق ناپلئونون چئورهسینده دایانمیش کؤپکلر دیش قیجیردیب میریلداماغا باشلایینجا سسسیزجه یئرلرینده اوتوردولار. بونون آردینجا قویونلارین اون بئش دقیقهلیک قولاق باتیرجی "دؤرد آیاق یاخشی ، ایکی آیاق یامان" ملشمهلری هر چئشید دارتیشمایا سون وئردی. اسکوئیلر یئنی دوزهنی باشقا حئیوانلارا آچیقلاماق اوچون تارلانین دؤرد بوجاغینا گؤندریلدی. -«یولداشلار! » اودئدی. « اینانیرام ،سیز یولداش ناپلئونون بو اؤز وئریسینی؛ بو آغیر گؤرهوی اوزهرینه گؤتورمهسینی اولدوقجا یاخشی دگرلندیریرسینیز. یولداشلار! سانمایین اؤندرلیک خوشا گلیم بیر ایشدیر. یوخ ، او چوخ آغیز، چوخ چتین بیر یوکوملولوکدور. کیمسه یولداش ناپلئون کیمی حئیوانلارین ائشید اولماسینا اینانمیر. او چوخ سئوینر سیز اؤز ایشلرینیزه اؤزونوز قرار وئرهسینیز آنجاق سیز بیر گون یانلیش بیر قرار وئرسهنیز بیلیرسینیزمی نه اولاجاق ؟ دوشونون سوچلولوغو آنلاشیلان اسنوبالین ساچما ساپانلارینا اینانیب دالیسیجا دوشسهایدینیز نه اولاجاق ایدی؟» -« او اینکلیک ساواشیندا چوخ اورهکلی ایدی.»دئیه کیمسه دیللندی. -« اورهکلیلیک چوخ اؤنملی دئییل. اؤنملی اولان باغلیلیق، سؤزه باخماقلیقدیر. اینکلیک ساواشینا گلینجه، من اینانیرام بیز بیرگون اسنوبالین ساواشداکی پایینین قابارتیلدیغینی آنلایاجاغیق. یولداشلار! بیزیم بو گونکو گرهگیمیز دوزهندیر دوزهن!...سیخی دوزهن . بیر یانلیش آددیم بیزی دوشمنلرین آیاغینین آلتینا آتا بیلر. بیر یانلیش آددیم جونزو گئری قایتارا بیلر. دوغرودان سیز جونزون گئری دؤنمهسینی می ایستهییرسینیز؟ » یئنه سورغو یانیتسیز ایدی. گئرچکدن حئیوانلار جونزون قاییتماسینی ایستهمیردیلر. سود گونو دارتیشمالاری جونزو قایتاراجاقدیرسا اوندا بو دارتیشمالارا سون وئریلمهلی ایدی. بو سورهده دوشونوب داشینماغی باجاران باکسئر حئیوانلارین گئنل دویغوسونو بو دئییشله دیله گتیردی: «یولداش ناپلئون نه دئسه دوزدور». بوندان بئله او، اؤزونه اؤزگو اولان « من برک چالیشاجاغام» دئییمینه، یئنی منیمسهدیگی « ناپلئون نه دئسه دوزدور» دئییمینیده ائکلهدی. هاوالار دوشونجه، یاز اکینی باشلاندی. اسنوبال ایشلهین ائوجیگین قاپیسی قاپاتیلدی. هامی دوشهمهدهکی چیزگهلرین سیلیندیگینی سانیردی. سود گونلری، سحر ساعات اوندا حئیوانلار، گلن یئدیجهنین بویروقلارینی آلماق اوچون بؤیوک آمباردا توپلاشیردیلار. قوجا مئیجرین قافاتاسی قویلاغیندان چیخاردیلاراق سیلینیب بایراغین آلتیندا، توفنگین یانینا قویولموشدو. حئیوانلاردان ایستهنیلمیشدیر: بایراغی قالدیردیقدان سونرا، بؤیوک آمبارا گیرمهدن اؤنجه قافاتاسینین اؤنوندن، سایغیلی بیر بیچیمده سان گئچسینلر. حئیوانلار بو گونلر، گئچمیشده کی کیمی بیر بیرلرینه یاوونموردولار. ناپلئون، اسکوئیلر بیرده قوشوق قوشماقدا، ماهنی یازماقدا اولاغان اوستو یئتنگی اولان مینیموس آدلی بیر دونقوز گلیب قالدیریمین اؤن بؤلومونده، کؤپکلرین اولوشدوردوغو یاریم دگیرمینین اورتاسیندا اَیلشیردیلر. باشقا دونقوزلار بونلارین آرخاسیندا اوتوروردولار. حئیوانلارین قالانی، بونلارین قارشیسینداکی گئنیش آلاندا آیاقدا دایانیردیلار. ناپلئون، چیریکسل بیر بیچیمده، گلن یئدیجهنین بویروقلارینی اوخویوردو. حئیوانلار "اینگیلیس حئیوانلاری" ماهنیسینی اوخودوقدان سونرا داغیلیشیردیلار. اسنوبالین قوولماسینین اوچونجو یئدیجهسینده، حئیوانلار ناپلئونون: « یئل دگیرمانی تیکیلهجک» بیلدیریسینین ائشینمهسیندن شاشیردیلار. ناپلئونون دوشونجهسینین دگیشمهسینین ندنلری آچیقلانمادی،ناپلئون بیلدیرسینده «دونقوزلارین اؤزل قورولونون آپاردیغی اینجهلهمهلرگؤستریر؛ یئل دگیرمانینین تیکیشی ایکی ایل چکهجک بو داها چوخ ایشلهمک دئمکدیر. بونا گؤره، گرهکیرسه گونلوک یئیهجک آزالاجاق» دئیه حئیوانلاری اویارمیشدی. آخشام، اسکوئیلر ، قاپالی بیر اوتورومدا حئیوانلارا آچیقلادی: - « ناپلئون ، ایندییهدک، نه تکجه یئل دگیرمانینا قارشی چیخماییب بلکه بؤلگهده اونو اؤنهرن ایلک کیمسهده ائله او اولموشدور. اسنوبالا گلینجه، او ائوجیکدهکی چیزگهلری، ناپلئونون یازیلارینین ایچیندن اوغورلامیشدی. » - « ندن ناپلئون ائله سرتلیکله اسنوبالا قارشی چیخیردی»دئیه بیریسی سوروشدو. اسکوئیلر اونا بیج-بیج باخاراق دئدی: -« بو یولداش ناپلئونون اوستالیغی ایدی. اونون یئل دگیرمانینا قارشی چیخماسی یالنیز بیر مانئور ایدی آزغین اسنوبالین کؤتو ائتکیسیندن قورتولماق اوچون. ایندی اسنوبالین قاچماسییلا انگللر اورتادان قالخیب. آرتیق یئل دگیرمانینین تیکیلمهسینده بیر ساقینجا یوخدور.» اسکوئیلر قویروغونو بوللایا-بوللایا اویان بو یانا گئدهرک گوله-گوله ائکلهدی: - «بونا اؤنلم دئیرلر یولداشلار اؤنلم!» حئیوانلار، اؤنلمین نه اولدوغونو بیلمیردیلر آنجاق اسکوئیلرین قاندیریجی دانیشیغی، یانینداکی اوچ کؤپگین دیش قیجیرتمالاری، اونلاری بو آچیقلامالاری دارتیشمادان اونایلاماغا زورلادی. |
||
