 |
 |
|
|
سککیزنجی بؤلوم اؤلدوروشلردن تؤرهنن قورخولار یاتیشینجا، حئیوانلارین بیر نئچهسی بویروقلارین آلتینجی بؤلومونده « کیمسه باشقاسینی اؤلدومهملیدیر» دئیه یازیلدیغینی آنیمسادیلار یا آنیمسادیقلارینی ساندیلار. اونلار دونقوزلارین یانیندا بو قونویا توخونماق ایستهمهسهلرده، اؤلدوروشلرین بو بویروقلا اوزلاشمادیغینی دوشونوردولر. بونونلار ایلیشکین، کلووئر بئنجامیندن آلتینجی بویروغون اوخونماسینی ایستهدی. بئنجامین هئپ اولدوغو کیمی، بئله ایشلره قاریشمادیغینی ایرهلی چکهرک اوخوماقدان چکینینجه کلووئر گئدیب موریئلی گتیرملی اولدو. موریئل بویروغو اوخودو: « ندنسیز کیمسه باشقاسین اؤلدورمهملیدیر.» بویروغون باشینداکی سؤزجوک ندنسه حئیوانلارین یادداشیندان سیلینمیشدی. بئلهلیکله اونلار بویروقلارین پوزولمادیغینی گؤردولر. ساتقینلارین اسنوبال ایله ال بیر اولماسی اونلارین اؤلدورمهسینه یاخشی بیر ندن ساییلا بیلردی. او ایل حئیوانلار اؤتن ایللردن چوخراق ایشلهدیلر. گونلوک چؤل ایشلری ایله یاناشی یئل دگیرمانینین دووارلارینی ایکی قات ائنیلیراق هؤرمک لاپ بئللرینی بوکموشدو. اونلار هردن جونز چاغیندان چوخراق چالیشیب آزراق یئدیکلرینی دوشونوردولر. اسکوئیلر، سود گونلری تویناغیندا اوزونسوو بیر کاغیذ توتاراق اونون اوزوندن چئشیدلی یئیهجکلرین اورهتیمینین گئچمیشه گؤره یوزده ایکی یوز، یوزده اوچ یوز یا یوزده بئش یوز آرتدیغینی بیلدیریردی. الده بیر قانیت یوخویدوحئیوانلار اسکوئیلرین سؤزلرینه اینانماسینلار. اؤزه لیکله اونلار، آرتیق جونز دؤنمینین نئجهلیگینی ده آیدینجا آنیمسامیردیلار. هردن حئیوانلارین اورهگیندن: « کئشگه بو سایلارین، یوزدهلرین آرتیشی یئرینه بیر آز گونلوک یئیهجگیمیز آرتاردی!» گئچیردی. ایندی ناپلئونون بوتون تاپشیریقلاری دونقوزلارین بیرینین-اؤزه لیکله اسکوئیلرین-آراجیلیغی ایله چاتدیریلیردی. ناپلئون اون بئش گونده بیر آنجاق گؤرونوردو. باییرا چیخاندا ایسه، قورجو کؤپکلردن باشقا، بیر قارا خوروزدا جارچیلار کیمی قاباغیندا یورویهرک قوققولو قوسو ایله گلیشینی بیلدیریردی. ناپلئونون تارلا ائوینده باشقالاریندان آیری اولاراق اؤزونه اؤزگو بیر اوتاقدا قالدیغی سؤیلهنیلیردی. او یئمکلرینی قوناق اوتاغینین دولابیندان گتیریلمیش چینی قاب-قاجاقدا یئییردی. یئمک یئیرکن ایسه ایکی کؤپک اونا قوللوق ائدیردیلر. بیلدیریلمیشدی؛ بوندان بئله هر ایل ناپلئونون دوغوم گونو، دئوریم تؤرهنلری کیمی توفنگ آتیلاجاقدی. حئیوانلار آرتیق ناپلئونو تؤرنسل یولداشیمیز، اؤندیمیز آدلاری ایله سسلهییب آدینی یالین اولاراق چکمیردیلر. دونقوزلار گونده اونا « حئیوانلارین آتاسی »، « اینسانلاری ییلدیران»، «قویونلارین چوبانی »، «اؤردکلرین آرخاداشی » کیمی یئنی تاخما آدلار قوشوب قوندارماقدان یورولموردولار. اسکوئیلر توپلانتیلاردا، گؤزلرینین یاشی یاناقلاریندان یووارلانارکن، ناپلئونون اوسوندان، اورهگینین کؤورکلیگیندن، بوتون حئیوانلارا ( اؤزلیکله باشقا تارلالاردا کؤله کیمی یاشایان موتسوزحئیوانلارا) اولان درین سئوگیسیندن دانیشیردی. آرتیق تارلادا بوتون باشاریلار اونون آدینا یازیلیردی. اؤرنک اولاراق بو گونلر ایکی تویوغون دانیشماسیندا: «من اؤندریمیز ناپلئونون گؤستریشی ایله آلتی گونده بئش دؤنه یومورتلامیشام» و یا ایکی اینگین سو ایچرکن قونوشماسیندا: « بو گون باشچیمیزین کؤلگهسی آلتیندا سو نه ایچملیدیر» کیمی سؤزلری چوخ ائشیتمک اولاردی. مینی موس تارلاداکی گئنل دویغونو « یولداش ناپلئون» باشلیقلی قوشقوسوندا بئله دیله گتیردی: اؤکسوزلرین آتاسیسان موتلولوغون قایناغیسان اورکلرین آغاسیسان یاشا یاشا جان ناپلئون تارلامیزا شان ناپلئون
بیز یاتارکن سن سن اویاق آج قالیرسان بیزلر دویاق سن سن بیزه آرخا، دایاق یاشا، یاشا جان ناپلئون تارلامیزا شان ناپلئون
یارین بیر یاوروم اولاجاق بؤیویوب یاشا دولاجاق دونیایا هارای سالاجاق یاشا یاشا جان ناپلئون تارلامیزا شان ناپلئون ناپلئون قوشقونو بگنیب تاپشیردی اونو بؤیوک آمبارین دوواریندا، یئددی بویروغون قانشاریندا یازسینلار. اسکوئیلر قوشقونون یانیندا آغ بویاقلا ناپلئونون یاناکی بتیمینی ده چکدی. بو آرادا ناپلئون وامپئرین آراجیلیغی ایله قونشو تارلالارلا یاریمچیق قالان دانیشیقلارینی بیر یانلیق ائلهمگه چالیشیردی. آغاجلار هله ساتیلمامیشدی. فیریدریک پیلینگتوندان چوخراق آغاجلاری آلماغا ماراقلی ایدی. آنجاق اؤنردیگی فییَت چوخ دوشوک ایدی. بو سیرادا فیریدریکین، حئیوانلار تارلاسینا سالدیری دوزنلهمکده اولدوغو سؤیلنتیسی یئنیدن دیللره دوشدو. اسنوبالین پینچفیلد تارلاسیندا گیزلندیگی سؤیلهنیلیردی. یایین اورتالاریندا اوچ تویوق اسنوبالا قورشالاناراق ناپلئونو اؤلدورمک ایستهدیکلری بیلدیریلدی. تویوقلار دورمادان اؤلدورولدولر. ناپلئونون ساغلیغینی قوروماق اوچون یئنی اؤنلملر آلیندی. او یاتارکن دؤرد کؤپک یاتاغینین دؤرد بوجاغیندا کئشیک چکیردیلر. پینکای آدلی بیر چوشقا ایسه، ناپلئونو آغیلاماسینلار دئیه اونون یئمکلری یئمهدن اؤنجه دادماغا گؤرهولندیریلدی. بوسورهده ناپلئونون آغاجلاری ویلینگتونا ساتاجاغی ائلهجهده بیر پارا اورونلری دگیش توقوشو اوزهرینده فاکسفود تارلاسی ایله قالارغی بیر آنلاشییا گئچهجگی آچیقلاندی. ناپلئون ایله پیلینگتونون ایلیشگیلری وامپئرین آراجیلیغی ایله ایلیملاشماقدا ایدی. حئیوانلار ویلینگتونا بیر اینسان اولدوغو اوچون اینانمیردیلار آنجاق اونو قورخوب ایگرندیکلری فیریدریکدن یاخشی سانیردیلار. یایین سون گونلرینده یئل دگیرمانینین تیکیشی بیتدیکجه فیریدیریکین گؤزلهنیلن آزغینجا سالدیریسینین سؤیلنتیسیده گئتگئده گوجلهنیردی. دئییلیردی: « فیریدریک ییرمی الیتوفنگلی کیشی باشینا ییغاراق تارلایا سالدیرماق ایستهییر. او قاباقجادان شهرین یوکسک یارغیلیق- گوونلیک گؤرهولیلرینین بوغونو یاغلاییب تارلانی اله گئچیرسه کیمسه اونو یییه لیک بلگهسی قونوسوندا سوروشدورماسین». بونلارلا یاناشی فیریدریکین حئیوانلار یاپدیغی آجیماسیزجاسینا داورانیشلاریندان قورخونج اؤیکولر پینچفیلددان دیشارییا سیزماقدا ایدی: « فیریدریک قوجا بیر آتی قامچی آلتیندا اؤلدورموش. او اینکلری آجلیقدان قیرماقدادیر. او بیر ایتی دیری دیری اوجاغا آتیب یاندیرمیش. او آخشاملار خوروزلارین آیاقلارینا اولگوج باغلایاراق دؤیوشدوروب اگلنیر». حئیوانلار یولداشلارینین باشینا گلنلری ائشیدنده اؤفکهدن قانلاری قایناماغا باشلاییردی. اونلار چیغیر باغیر سالاراق یولداشلارینی اینسانلارین الیندن قورتارماق اوچون پیچفیلد تارلاسینا سالدیرماق بویروغو ایستهییردیلر. آنجاق اسکوئیلر اونلارا: « دوشونجه سیز ایشلره قالخیشمایین، یولداش ناپلئون هر نهیی یولونا قویاجاق »دئیه اویاریردی. فیریدرکه قارشی اولومسوز دویغولار گئتدیکجه آرتماقدا ایدی. بیر گون ناپلئون بؤیوک آمباردا بولوناراق ، آغاجلاری فیریدریکه ساتماغی ایندییهدک بئینیدن بئله گئچیرمهدیگینی دیله گتیرهلی دئدی: «فیریدریک کیمی آلچاق بیریسی ایله آلیش وئریش کیشیلیکدن اوزاق بیر ایشدیر». او سؤزلرینین سونوندا دئوریم ساوجیلاری گویرچینلره بوندان بئله فوکسفود تارلاسینا وارمامالارینی، « اینسانلارا اؤلوم» یئرینه ایسه، بوندان بئله « فیریدریکه اؤلوم» هارایی چکمهلرینی ایستهدی. یایین سون گونلرینده اسنوبالین باشقا بیر قورغوسونون اوستو آچیلدی. بوغدالیغی آلاق اوتو باسمیشدی. اسنوبال گئجهلهیین گلیشلرینین بیرینده اکیلهجک بوغدالارا آلاق اوتو توخومو قاتمیش ایمیش. آغیلدا بؤیورتلن دنهسی اوداراق اؤزونو اؤلدورن بیر ائرکک قاز، بوگیزلی ائیلمده اسنوبالا یاردیم ائتدیگینی، اؤزلجه اسکوئیلره سؤیلهمیشدی. یئنه صاندیقلار آچیلیب پامبیقلارتؤکولدو: « اسنوبالین اینکلیک ساواشیندا، بیر درجهلی قوچاق حئیوان اؤدولو آلماسی اونون اویدوردوغو بیر یالان ایمیش. داها دوغروسو او-چوخلارینین ساندیقلارینا قارشین- نه تکجه اؤدول آلمامیشدی ترسینه ساواشدا گؤستردیگی قورخاقلیق اوزوندن قینانمیشدی بئله». یئنه حئیوانلارین بیر سوروسو بونو ائشیدهلی تومدولار آنجاق اسکوئیلر چوخ تئز یانیلدیقلارینی اونلارا ایناندیرا بیلدی. گوزون گلیشی ایله اوساندیریجی چابالامالار سونوجلاندی. یئل دگیرمانینین تیکیشی، چؤلون ییغیب ییغیشدیرماسی ایله بیرگه باشا چاتدی. بوتون چتینلیکلره، باجاریقسیزلیقلارا، آراجلارین ایکللیگینه، ایشلرین دوزگلمزلیگینه، اسنوبالین آزغینلیغینا باخمایاراق یئل دگیرمانی دئییلن گونونده بیتیب یالنیز آیقیتلارین قوشوشدورلماسی قالیردی. وامپئر آیقیتلاری آلماق اوچون دانیشیق آپارماقدا ایدی. حئیوانلار یورولسالاردا؛ اؤیونوردولر. اونلار یاراتدیقلاری بو باش یاپیتین باشینا فیرلاناراق آلقیشلاییجی گؤزلرله اونو سوزوردولر. یئل دگیرمانی گؤزلرینه قاباقکیندان قات قات گؤزل گؤرونوردو. دووارلارین ائنلیلیگی اؤنجهکیندن ایکی قات آرتیق ایدی. ایندی بونو، پارتلاییجی مادهدن باشقا بیر شئی ییخا بیلمزدی. حئیوانلار نئجه اللشدیکلرینی، نه انگللر آشدیقلارینی آنیمسادیقدا، اورهتج ایشلهییب یئلکن فیرلانینجا یاشاملاریندا نه دگیشیکلیکلر یاراناجاغی دوشوندوکده، یورغونلوق جانلاریندان چیخیب، آتیلیب دوشهرک یئل دگیرمانینین باشینا دولانیب سئوینجدن قیشقیریق سالدیلار. ناپلئون اؤزو، جارچی خوروزو ایله قوروجو کؤپکلرینی یانینا سالاراق ایشین بیتیشینی گؤزدن گئچیرمک اوچون یئل دگیرمانیا گلدی. او حئیوانلارین باشاریسینی قوتلایاراق یئل دگیرمانینا ناپلئون آدی وئریلهجگینی بیلدیردی. ایکی گون سونرا، حئیوانلار اؤزل بیر اوتوروم اوچون بؤیوک آمبارا چاغیریلدیلار. اونلار، ناپلئونون آغاجلاری فیریدریکه ساتماسینی ائشیدینجه گؤزلری بؤیودو. فیریدریکین داشیرغالاری یارین آغاجلاری آپارماغا گلهجکدی. ناپلئون اوزده ویلینگتونلا ایلگیلهنیرکن دالدا فیریدیکله گیزلی آنلاشما یاپماقدا ایمیش! بوتون باغلانتیلار فوکسفود تارلاسی ایله کسیلیب ویلینگتونا اولمایان قالمایان یامان-یوووزلار گؤندریلدی. گؤیرچینلرین پینچفیلد تارلاسینا گئتمهلری یاساقلانیب تاپشیریلدی؛ بوندان بئله «فیریدریکه اؤلوم» هارایی یئرینه ««ویلینگتونا اؤلوم» هارایی تپسینلر. ناپلئون سورهنی ایتیرمهدن حئیوانلاری فیریدریکین تارلایا سالدیرما اؤیکوسونون باشدان باشا یالان اولدوغونا، حئیوانلاری ایله کؤتو داورانما سؤیلنجهسینه بؤیوک اؤلچوده قول قاناد وئریلدیگینه ایناندیردی. بوتون بو سؤیلنتیلر، اسنوبال ایله بویروقچولاری وریندن یاییلمیش اولمالی ایدی. سونوندا اسنوبالین نه تکجه پینچفیلد تارلاسیندا گیزلنمهدیگی ترسینه ایللر بویو ویلینگتونون نؤکری اولاراق فوکسفود تارلاسیندا-دئییلنلره گؤره -سود گؤلونده یاشادیغی آیدینلاشدی. ناپلئونون بو قورنازلیغیندان دونقوزلارین چیچکلری چاتلاییردی. ناپلئون اوزده ویلینگتونلا آرا سازلاماسی، فیریدیکی آغاجلارین فییتینی اون ایکی لئره قووزاماغا زورلامیشدی. اسکوئیلر آرایا گئچهرک: -« یولداش ناپلئونون کیمسهیه اینانماسی-ایستر بئله فیریدرک اولسون- اونون اولاغان اوستو اوسونو گؤستریر. فیریدریک آغاجلارین پولونو چئک دئییلن قورو بیر کاغیذلا اؤدهمک ایستهییردی آنجاق یولداش ناپلئون آییقلیقلا آغاجلاری آپاریلمادان اؤنجه پوللاری-بئش لئرهلیک اولاراق-قاباقجادان آلاجاغینی سؤیلهدی. ائله او دئین کیمی ده اولدو. ایندیسه یئل دگیرمانینین بوتون آیقیتلارینی آلماغا یئترینجه پولوموز وار.» دئیه سؤیلهدی. بو اولایین آردینجا، آغاجلار توواراق تارلادان بوشاتیلدی. آغاجلار آپاریلدیقدان سونرا، پوللاری حئیوانلارا گؤسترمک اوچون بؤیوک آمباردا اؤزهل بیر اوتوروم گئچیریلدی. قوشا میدالینی تاخمیش ناپلئون، گولومسهیهرک قالدیرمین اوستونده کی سامان یاتاقدا اوتوراراق اؤزنله چینی بوشقابا دوزلموش پوللاری قاباغینا قویموشدو. حئیوانلار بیرهر- بیرهر گلیب بوشقابا بیر گؤز آتیب گئچیردیلر. باکسئر بورنونو پوللارین آراسینا سوخوب ایلهمک ایستهدیکده سولوغوندان اسکناسلار تیترهشیب خیشیلدادیلار. اوچ گون سونرا تارلادا اینانیلماز بیر قارغاشا قوپدو. اوزونه اؤلوم توزو قونموش وامپئر قوشا تکرینی قووا- قووا جیغیردان آولویا گیردی. او آولونون اورتاسیندا قوشا تکرینی یئره تولازلایاراق تلهسیک تارلا ائوینه ساری قوشدو. آز سونرا ناپلئونون اؤفکهلی بوغونوق باغیرتیسی اوتاغیندان ائشیدیلدی. اولانلارین چاوی یانغین کیمی هر یانی بورودو. پوللار قوندارما ایمیش! فیریدریک آغاجلاری هئچه آلمیشدی. ناپلئون تلم-تلهسیک حئیوانلاری چاغیریب توتوق بیر سسله فیریدیکین اؤلدوروش بویروغونو وئردی: «فیریدریک توتوقلانینجا دیری- دیری قازاندا قایناتیلاجاقدیر.» او یئنه حئیوانلاری اویاراراق آرتیردی: -« بوندان بئله، بو آزغینلیقدان کؤتوسونو ده گؤزلهملیییک . فیریدریک ایله قولداشلاری هر آن تارلایا سالدیرا بیلرلر.» بونون آردینجا، تارلانین گیریش یئرلرینده گؤزتچیلر یئرلهشدیریلدی. اوستهلیک دؤرد گؤیرچین پلینگتونون کؤنلونو آلیب یئنیدن باغلانتی قورماق اوچون فوکسفود تارلاسینا گؤندریلدی. ائرتهسی گون حئیوانلار دان یئملرینی یئیرکن گؤزتچیلر توواراق گلیب فیریدریک ایله قولداشلارینین آلا قاپیدان ایچرییه گیردیکلرینی بیلدیردیلر. حئیوانلار قورخمادان باسقینچیلاری قارشیلاماغا قوشدولار. اوتقو بو کز اینکلیک ساواشینداکی کیمی قولای گؤرونموردو. فیریدریکگیل آلتیسی توفنگلی اولاراق اون بئش کیشی ایدیلر. اونلار حئیوانلارین اللی آدیملیغینا چاتجاق اود یاغدیرماغا باشلادیلار. حئیوانلار آچیلان قورشونلارین قورخونج پارتلاییشلارینا دایانانماییب-ناپلئون ایله باکسئرین چابالارینا باخمایاراق- چابوق گئری چکیلدیلر. حئیوانلارین بیر نئچه سی یارالانمیشدی. حئیوانلار تارلا یاپیتلارینا سیغیناراق اوغرون-اوغرون دلیک-دئشیکدن باییرا گؤز تیکدیلر. بوتون اوتلاق ائلهجهده یئل دگیرمانی دوشمنین الینده ایدی. ناپلئون اؤزونو ایتیرمیشدی. او قونوشمادان آشاغی-یوخارییا گل-گئت ائدهرک شوشلنمیش قویروغونو سگیریردی. اومان گؤزلر فوکسفود تارلاسینا تیکیلمیشدی .ویلینگتونون آداملاری یاردیمدا بولونسایدیلار اونلارین قازانمالاری اولاسیایدی. بو سیرادا دونن فوکسفود تارلاسینا گؤندریلن گؤیرچینلر گئری دؤندولر. بیرینین آیاغیندا ویلینگتوندان بیر ساو وار ایدی: « باشینیزا هر نه گلسه آزدیر.» بو آرادا فیریدریک ایله قولداشلاری یئل دگیرمانینا چاتمیشدیلار. حئیوانلار اومودسوزجاسینا اونلارا باخیردیلار. ایکی کیشی توخماق ایله دلگچ گتیردیلر. اونلار یئل دگیرمانینی ییخماق ایستهییردیلر. -« اولاناقسیزدیر. » ناپلئون باغیردی.« قورخمایین یولداشلار! بیز دووارلاری چوخ قالین تیکمیشسک اونو یئددی-سگگیز گونه بئله ییخا بیلمزلر.» بئنجامین کیشیلرین یاپدیقلارینی اؤزنله گؤزدن گئچیرمکده ایدی. اونلار توخماق-دلگچله دگیرمانین خیمیندا بیر دلیک دلدیلر. بئنجامین آغیز-بورنونو اگیشدیرهرک: « منده بئله دوشوندوردوم. نه ائدیکلرینی گؤرمورسونوز مو؟ آز سونرا دلیگی باروت ایله دولدوراجاقلار.»دئدی. حئیوانلار قورخا- قورخا بکلهییردیلر. سیغیناجاقدان دیشارییا چیخماق قورخولو ایدی. آز سونرا آداملارین دؤرد یانا قاچدیقلاری گؤروندو. بونون آردینجا قولاق باتیریجی بیر گورولتو یئری گؤیو سیلکهلهدی.گؤیرچینلر گؤیه اوچوشدولار. ناپلئوندان باشقا بوتون حئیوانلار اؤزلرینی اوزو قویولو یئره آتیب آیاقلاری ایله اوزلرینی گیزلتدیلر... حئیوانلار اؤزلرینه گلدیکده یئل دگیرمانی اولان یئردن قارا دومان قالخماقدا ایدی. سونوندا آغیر- آغیر اسن یئل توستو بولودونو سوپوروب آپاردی. یئل دگیرمانی یوخ اولموشدو. حئیوانلار بو گؤرونتونو گؤرهلی قانلاری قایناماغا باشلادی. آز اؤنجه اومودسوزلوغا، قورخویا قاپیلان حئیوانلار بو آشاغیلیق داورانیشدان قودوردولار. اونلار باغیر- باغیر باغیراراق بویروق آلمادان هامیسی بیرلیکده اؤج آلماق اوچون دوس- دوغرو دوشمنه ساری یومولدولار. اونلار آرتیق یاغدیریلان قیزیل قورشونلاری اؤنمسهمیردیلر. بو بیر اؤلوم-دیریم ساواشی ایدی. بارماقلاری تتیکدن چکلمهین آداملار حئیوانلارلا گؤیوس-گؤیوسه گلینجه دگنکله، آغیر چکمهلری ایله دؤیمگه باشلادیلار. بیر اینک، اوچ قویون، ایکی قاز اؤلدورولدو. یارالانمایان کیمسه- دئمک اولار- یوخویدو. آرخا سیرادان سالدیرینی یؤنهتن ناپلئون بئله، قویروغونون اوجوندان قورشونلاناراق یارالانمیشدی. آداملارا گلینجه اونلاردا ساغ بوراخیلمامیشدیلار؛ اوچونون باشی باکسئرین تپیکلری ایله یاریلمیشدی. بیر باشقاسینین قارنی ایسه اینکلرین بیرینین بوینوز ایله ییرتیلمیشدی. جئسی ایله بولوبئل بیر کیشینین تومانینی اگنیندن سیییریب چیخارتماق اوزهره ایدیلر. ناپلئونون گؤستریشی ایله چیغین یانیندا بوسقودا یاتمیش دوققوز کؤپک آنسیزین سالدیرینجا آداملارین اورهگینه قورخو دوشدو. اؤزلرینی قوشاتیلمانین بیر آددیملیغیندا گؤردولر. فیریدریک: « جانینی گؤتورن قاچسین» دئیه قیشقیرینجا، اؤدلک دوشمنلر اکینلیگین دیبینه ساری قاچدیلار. اونلار تیکانلی چیغی آشانادک سون دورتمه-تپیکلری حئیوانلاردان یئدیلر. حئیوانلار یورغون-آرغین ایدیلار؛ آنجاق قازانمیشدیلار. تارلایا ساری دؤننده اوتلارین اوزهرینه سریلمیش اؤلدورولموش یولداشلارینین گؤرونتوسونو گؤرونجه چوخلارینین گؤزلری یاشاردی. یئل دگیرمانیندا اوزگون-سوسقون دوراقساندیلار . دوغرو ایدی؛ یئل دگیرمانی یوخ اولموشدو. او خیمیندان داغیلمیشدی. آرتیق اونو یئنیدن تیکمک اوچون گئچمیشدهکی کیمی تؤکولن داشلاردان یارارلانماق اولمازدی. داشلار بئله یوخ اولموشدو. پارتلاییشین گوجو داشلاری یوزلر آددیم اوزاقلارا تولازلامیشدی. سانکی بورادا باشلانیشدان یئل دگیرمانی یوخویموش! حئیوانلار تارلا ائوینه یاخینلاشارکن ساواش سورهسینده آنلاشیلماز ندنلره گؤره آرادا-برهده گؤرونمهین اسکوئیلر قویروغونو بوللایاراق گولومسهیه-گولومسهیه قاباقلارینا قاچدی. بو سیرادا تارلا ائولریندن تؤرنلرده آتیلان توفنگین سسی ائشیدیلدی. -« نه اوچون توفنگ آتیلیر؟» باکسئر سوروشدو. -« باشاریمیزی قوتلاماق اوچون یولداش!» اسکوئیلر دوشونو قاباغا وئرهرک گورلادی. ساواش سیراسیندا نالی دوشموش، تویناغی یاریلمیش، دیزلری قانامیش، بالدیرینا قیزیل قورشونلار سانجیلمیش باکسئر شاشاراق یئنه سوروشدو: -« سیز هانسی باشاریدان دانیشیرسینیز؟» -« بیز دوشمنی توپراغیمیزدان، بو قوتسال حئیوانلار تارلاسیندان قوومادیق می؟» -« آمما اونلار بیزیم ایکی ایللیک امگیمیزی، یئل دگیرمانیمیزی دارماداغین ائتدیلر.» -« بونون نه اؤنمی وار بیز بیر باشقاسینی تیکهریک .بیزیم کؤنلوموز ایستهسه بیرینین یئرینه آلتیسینی بئله تیکه بیلهریک . یولداش سیز گؤردوگوموز بو بؤیوک ایشین دگرینی آنلایابیلمهییرسینیزمی؟ دوشمن اوستونده دوردوغوموز بو توپراغی الیمیزدن آلمیشدی. اؤندریمیز یولداش ناپلئون ساغ اولسون! اونون چاباسی ایله ایندی بیز تورپاغیمیزین قاریش قاریشینی گئری آلمیشیق.» -« بئلهلیکله ایندی بیز اؤزوموزونکو اولانلاری یئنه اؤزوموزه قایتارمیشیق» -« بئله دیر یولداش ! بو بیزیم ان بؤیوک باشاریمیزدیر.» حئیوانلار دوشه-قالخا آولویا واردیلار. باکسئرین یارالاری برک سیزیلداییردی. او یئل دگیرمانینین یئنیدن تیکمهسینی گؤزلرینین اؤنونده جانلاندیراراق ایندیدن اؤزونو بو آغیر ایشه گؤرهولندیریردی؛ آنجاق ایلک کز اولاراق اون بیر یاشینا واردیغینی، داها گئچمیشده کی کیمی یاخشی ایشلهیه بیلمهیهجگینی آنلاییردی. حئیوانلار یاشیل تویناق-بوینوزلو بایراغین دالغالانماسین گؤردوکده ، توفنگین یئددی دؤنه آچیلیشین ائشیتدیکده، ناپلئونون قوتلاما دئمهجین دینلهدیکده نه بؤیوک باشاری قازاندیقلاری آنلاماغا باشلادیلار. ساواشدا اؤلدورولموش حئیوانلارین قویلاما تؤرهنی گئچیریلدی. باکسئر ایله کلووئر اؤلو آراباسی یئرینه قوللانیلان داشیرغانی چکیردیلر. ناپلئون اؤزو لاپ اؤن سیرادا یورویوردو. حئیوانلار ایکی گون بایرام توتدولار. اونلار بو سورهده چالدیلار، اوخودولار، توفنگ آتدیلار. اؤدول اولاراق مال-داوارین هرهسینه بیر آلما، قانادیلیلارا بیر سخیم بوغدا، ایت- پیشیگین هرهسینه ایسه اوچ دنه چؤچه وئریلدی. وورشمایا « یئل دگیرمانی ساواشی » آدی وئریلدی. ناپلئون یئنیجه چیخارتدیغی یاشیل بایراق میدالینی اؤزونه سوندو. ایکی گونلوک اگلنجهلر، شؤلنلر، چال- چاغیرلار اوغورسوز قوندارما پوللار اولایینی بیر یوللوق یادلاردان چیخارتدی. نئچه گون سوووشدوقدا، دونقوزلار تارلا ائوینین آلت اوتاغیندا، ائوی آلارکن گؤزلردن یاییینمیش بیر صاندیق ایچکی تاپدیلار. او گئجه تارلا ائویندن گلن اینگلیس حئیوانلاری قارشیقلی ماهنیلارین سسی بوتون باییرداکیلاری شاشدیردی. ساعات دوققوزلاردا جونزون اسکی بؤرکونو قویان ناپلئونون، تارلا ائوینین دال قاپیسیندان چیخدیغی، آولودا بیر سوره آتیلیب دوشهرک قوشدوغو، سونرا فیرلانیب یئنه ایچرییه گیردگی آچیق -سئچیک گؤروندو. ائرتهسی گون، دان یئرینین سؤکولدوگونه باخمایاراق تارلا ائوینی سوسقونلوق بورویوب باییرا چیخان یوخویدو. ساعات دوققوزدا اسکوئیلرین دبرجهلهنه-دبرجهلهنه دیشارییا چیخدی. اونون گؤزلری شیشمیش، قویروغو ساللانمیش، اؤزوده برک سایری ایمیش کیمی گؤرونوردو. او حئیوانلاری توپلاشدیراراق اوزوجو بیر اولایین اوستونو آچدی: -« یولداش ناپلئون اؤلور». حئیوانلار ایچین-ایچین آغلاشدیلار. سس-کوی اولماسین دئیه تارلا ائوینین ائشیگینه سامان دؤشهنیب حئیوانلار بارماق اوجوندا گل -گئت ائدیردیلر. اونلار دولوقساناراق بیر بیرلریندن سوروشوردولار: -« یولداش ناپلئون اؤلورسه بیر نه ائتمهلیییک؟» یاییلان بیر سؤیلنتییه گؤره، اسنوبال سونوندا، ناپلئونو آغیلاماغین یولونو تاپمیشدی. گون اورتا چاغی اسکوئیلر ناپلئونون سون سؤزلرینی ایلتمگه گلدی: -« ایچکی ایچن کیمسه گرهک اؤلدورولسون». آخشام چاغی ناپلئونون دورومو بیر آز یاخشیلاشدی. ائرتهسی گون اسکوئیلر ناپلئونون ساغلیغینی الده ائتدیگینی سؤیلهدی. اؤیله سونراسی ناپلئون ایشینین باشینا قایتدی. بیریسی گون ناپلئونون، وامپئره، ویلینگتون بازاریندان اونا « آرپا سویو چکمه» بیتیگی آلماسینین تاپشیردیغی اؤیرهنیلدی. یئددی گون سونرا، ناپلئونون گؤستریشی ایله امکلی اولاجاق حئیوانلارین اوتلاماسی، دینجلمهسی اوچون آییرت ائدیلمیش، باغچانین اؤتهسینده کی چیمنلیک سورولدو. چیمنلیگین کؤدهلشدیگینه گؤره اورانین یئنیدن اکیلهجگی بیلدیریلدی آنجاق چوخ چکمهدی اورادا ناپلئونون آرپا اکمک ایستهدیگی آنلاشیلدی. حئیوانلار بیر گون، باش چیخارتمادیقلاری، شاشیرتیجی بیر اولایا تانیق اولدولار. اونلار گئجه ساعات اون ایکیده، آولودان گلن خاریلتی سسیندن، آغیللاریندان ائشیگه تؤکولدولر. آی ایشیغی ایدی. بؤیوک آمبارین دووارینین آیاغیندا، یئددی بویروق یازیلان یئرده ، اسکوئیلر باییلاراق ایکییه بؤلونموش نردیوانین اوزهرینه سریلمیشدی. هندهورینده بیر فنر، بیر چؤتکه، بیرده یئره جالانمیش آغ بویاق قوتوسو وارایدی. کؤپکلر تلهسیک اسکوئیلری چنبره آلیب آیاق اوسته دورا بیلینجه اونو تارلا ائوینه گؤتوردولر. بئنجامیندن باشقا کیمسه باش وئرنلرین آنلامینی قانا بیلمهدی؛ آنجاق اودا بیر شئی سؤیلهمهییب یالنیز باشی توولاماغا یئتیندی. نئچه گون سونرا ، موریئل یئددی بویروغو گؤزدن گئچیریرکن بئشینجی بویروغو یانلیش اؤیرندگینی باشا دوشدو. او بئشینجی بویروقدا: « کیمسه ایچکی ایچمهملیدیر» دئیه یازیلدیغینی دوشونوردو؛ آنجاق یادیرغانمیش بیر سؤزجوک وارایمیش. بئشینجی بویروغون دوزو بئله ایدی: « اؤلچوسوز کیمسه ایچکی ایچمهملیدیر.» |
||
