زققومون کؤکو

مظفر ايزگو

    آلير آلير، دئيير و آرتيريردي: اوشاق دئديگين گوله بنزر، بو گون سولار، صاباح آچار… آما آتام بيلميردي کي، بو گون سولان باشقا بير گولدور، صاباح آچان باشقا بير گول. و بير گول، او گون ايلک کز دوکتورون ماساسينا ياتدي. دوکتور بحري بَي، اورامي دينله‌دي، بورامي دينله‌دي.

-هارادايدينيز ايندييه قدر، دئدي.

-ائوده ايديک، دئدي آتام. يوخسول آتاسي ايدي بحري بَي… آتامين، اووچونا قويدوغو جينقيرتيلي خيردا پوللارا نه باخدي، نه ده بير سس ائتدي، يالنيز،

-صاباح يئنه گتيرين، دئدي.

اورادا يئديگيم اوچ ايينه، بير ده بؤيوک-بؤيوک گوللاچلار، بير هفته‌ده آياغا قالديردي مني. آما او گئجه، نه آنام ياتدي، نه ده آتام. دوکتور مگر سولو ساپليجان دئميش. ائ‌ئ‌ی، سولو ساپليجان دا اوشاق دوشمني او زامانلار.

يازان : عباس ائلچین دوشنبه ۱۳۹۶/۰۲/۲۵ |

آخوندووون یئنی الیفبا اوغروندا موباریزه‌سی

ميصير محمدلي

      موستملکه‌چيليک اؤزونون بوتون پيس طرفلرينه باخماياراق، اگر آز-چوخ موترقّي سيويليزاسييايا عاييداتي وارسا، حاکيم اولدوغو جوغرافييادا اينفراستروکتور و مکتب، تئاتر، کيتابخانا کيمي مدني اينستيتوتلارين اينکيشافيندا خوصوصي رول اوينايا بيلير. بو باخيمدان 19-جو عصر چار موستملکه‌چيليگي ده آذربايجاندا سوسيال-مدني اينکيشاف اوچون موعين واجيب شرطلري ياراتدي.  

   ماراقليدير، گؤره‌سن روس ايستيلاسي و چاريزمين تأمين ائتديگي دونيوي تحصيل موحيطي اولماسايدي، حاديثه‌لرين سئيري نئجه دَییشردي؟ مثلا، روس تحصيللي بير ضيالي و چار ظابيطي اولان ايسماييل بَي قوتقاشينلي شخصي وسايتي حسابينا شاماخي شهر مکتبيني آچماسايدي، ميلّي مطبوعاتين بانيسي حسن بَي زردابي دونيوي تحصيل آلا بيلرديمي؟ يوخسا موللاخانا تحصيليني داوام ائتديريب، سيرادان بير آدام کيمي ياشاييب عؤمرونو باشا ووراردي؟ و يا ميرزه فتعلی آخوندوو آذربايجاندا سئکولار تحصيلين ايلک جيدي مودافيعه‌چيسي ميرزه شفيع واضح‌له معلوم صؤحبتيندن سونرا حياتي‌نين ايستيقامتيني دَییشه‌جک قراري وئرير؛ عبدالرحیم بَي حاقوئردیيئو م.ف.آخوندووون اؤلومونون اللينجي ايل دؤنومو موناسيبتي ايله قلمه آلديغي "ميرزه فتعلی‌نين حيات و فعاليتي" آدلي مقاله‌سينده، "ميرزه شفيع قيسا بير مودتين ايچريسينده ميرزه فتعلی‌نين دونياگؤروشونو تاماميله دَییشديردي، روس ديليني اؤيره‌نيب دؤولت ايداره‌لرينده قوللوغا گيرمگي اونا مصلحت گؤردو" – يازيردي. نتيجه‌ده ميرزه فتعلی روحاني اولماق فيکريني باشيندان آتير و شکي‌يه قاييداراق ائله او اثنادا آچيلان ايبتيدایي روس مکتبينه داخيل اولور، روس ديليني اؤيرنمه‌يه باشلايير. او، داها سونرا تیفلیسده روس ديليني تام اؤيره‌نير و موختليف ساحه‌لره عاييد روس و دونيا ادبياتينا چيخيش الده ائدير. فيرودون بَي کؤچرلي "آذربايجان ادبياتي" اثري‌نين بيرينجي جيلدينده بو باره‌ده قئيد ائدير کي، "قوللوق ايشلريندن فاريق اولدوقدا آسوده واختلاريني ميرزه روس کيتابلاري‌نين موطاليعه‌سينه صرف قيليب، بير چوخ معلوماتلار کسب ائديب. اونون آرتيق سئوديگي فلسفه‌يه داير، سياسي و ايقتيصادي عئلملرينه مخصوص کيتابلار ايميش". عوموميتله ايسه، م.ف.آخوندوو کيمي همين دؤورون بير چوخ فيکير آدامي‌نين آوروپا ايجتيماعي-سياسي دوشونجه‌سي و فلسفه‌سيندن بحث ائدن اثرلرله تانيشليغيندا، هومانيست ايدئيالاري منيمسه‌ييب تبليغ ائتمه‌سينده روس ديلي موهوم واسيطه اولوب.

يازان : عباس ائلچین سه شنبه ۱۳۹۶/۰۲/۱۹ |