عؤمر سئيف الدين (۱۹۲۰-۱۸۸۴)

     تورکييه ادبيياتي نين اؤنده گلن حيکايه يازارلارينداندير. عسكر، شاعير و گوجلو بير ادبي يئتَنَگي اولان بير اؤيرتمندير. تورک قيسا حيکايه جيليگي نين قوروجو ايسميدير. آيريجا ادبيياتدا توركچولوك آخيمي نين قوروجولارينداندير. تورکجه ده ساده لشمه نين ساوونوجوسودور. قيسا عؤمرونه چوخ ساييدا اثر سيغديرميشدير. 

 

  روشوت 

یازان : عؤمر سئيف الدين 

  بازار مئيداني نين بؤيوک چينار آغاجلاري، يئره دوشن کؤلگه لريني آلاجالانديراراق پيچيلداييرديلار. گوجلو کولک اسيردي. وکيل حاجي ناميق افندي کاغيذلاري اوچماسين دئيه، زومرود کؤشکه بنزه ين کيچيک دوکاني نين پنجره لريني باغلادي. سونرا گئتدي، آچيق قاپيني ايتله يرکن هئيبه سي چيينينده، يوينلي آتي نين جيلووو الينده، ساريقلي، قيسا بويلو، يومرو بير کندلي نين ياخينلاشديغيني گؤردو. 

  - سالام علي موعليم، - دئدي، - بئله واختسيز نه آختاريرسان بورادا؟ هله بازارا ايکي گون وار… 

  کندلي ايکي قارا نؤقطه يه بنزه ين باپبالاجا گؤزلريني داها چوخ قيياراق:  

  - علئيکومسالام ناميق افندي! بلايا دوشموشم. بير داوا اوچون گلميشم، - دئيه باشيني بولادي. 

  - ائئ، گل، بير آز صؤحبت ائدک. 

  - ائدک. 

  - درديني دانيش باخاق گؤرک. 

  - سندن باشقا کيمه دانيشاجام؟ 

  آتينين جيلووونو تاختا سکاميانين ديرگينه باغلادي. کيچيک دوکانا گيردي. جئويز ماساسينين ساغينداکي آلچاق حصير کتيلده اوتوردو. هئيبه سيني يانينا قويدو. ناميق افندي نين اوزاتديغي توتوندن بوکه-بوکه داواسيني دانيشماغا باشلادي. دوشمني کندين موختاري هويسوزاوغلو ايدي. هويسوزاوغلونون تورپاغيندا علي موعليم واختيله بير بينا تيکديرميشدي. ايندي خئيلي واخت کئچديکدن سونرا موختار بو بيناني ايسته ييردي. حالبوکي بينا کيمينديسه، يئر ده اونوندو دئمک… 

  - ناميق افندي چال ساققاليني قاشيدي. گؤزلوگونون اوستوندن باخاراق: 

  - سن حاقسيزسان، علي موعليم، - دئدي. 

  - حاقسيزام؟ 

  - بلي. 

  - خئير، من حاقلييام. نييه بيناني تيکرکن سسيني چيخارماميشدي.  

  - چيخارماسين. 

  - من حاقلي اولدوغومو بيليرم، ناميق افندي. داوادان ايمتيناع ائتمه يه جم.  

  - اودوزاجاقسان! 

  - اودوزوم، ضرر يوخدو. آما داوامدان گئري دورماياجام. 

  ناميق افندي حاقسيز داوالاري گؤتورمزدي. الي موعليم وکالت تکليفيني ردد ائتمک ايسته ييردي. لاکين  " بوزاؤيوک "  کندي نين خالقي اوتوز ايلليک موشتريلري ايدي. ائششک آخورونو بلله ين کيمي اونون دوکانيني بلله ميشديلر، حؤکومتده کي  بوتون ايشلري اوچون اونا موراجيعت ائديرديلر. قيشليغين بوتون بوغداسي هميشه اوردان گليردي. نهايت: 

  ياخشي، - سنين بو ايشينه باخاجام. اودوزساق، مندن اينجيميه جکسن، - دئدي. 

  - اينجيمرم، آما نييه اودوزاجاقسان؟ 

  - چونکي حاقسيزسان. 

  - حاکيمه گؤزل بير قوچ گؤندرسم؟ 

  - نه؟.. 

  - او واخت داواني اودا بيلمرم؟  

  - او واخت، هئچ شوبهه سيز، ايشي اودوزارسان! 

  - نه اوچون؟ 

  - يئني حاکيم سن بيلن آداملاردان دئييل. 

  الي موعليم وکيلين هيجانيني آنلايا بيلميردي. اوزون-اوزادي يئني حاکيمين مدحيني دينله دي. و بو شخص روشوتين، هديييه نين قورخونج دوشمنييميش! ان حاقلي شيکايتچي روشوت وئرمه يه تششببوث ائتسه، او ساعات دا حاقسيز چيخاريرميش! 

  علي موعليم: 

  - آللاه بئله دوزگون اينسانلاري دونيا اوزوندن اسکيک ائتمه سين، - دئيه دوعا ائتدي. 

  ناميق افندي: 

  - آمين، آمين، - دئدي. 

  داوادان، دوزگونلوکدن بير ساعاتا قدر دانيشديلار. وکالت اوچون راضيلاشديلار. وکيل اوميدسيزدي. بو ايشي خطير اوچون بوينونا گؤتوردو. حاقسيزليق او قدر آچيق-آشکار ايدي کي… 

  ايکي هفته سونرا، عئيني ساعاتدا علي موعليم ياشيل بويالي دوکانين قاپيسيندا گؤروندو. ناميق افندي عريضه يازيردي. گؤزلوگونون اوستوندن موشتريسيني گؤرونجه گولدو: 

  - خوش گلدين! نه دئييرسن داواني اوددوق، - دئدي. 

  بو قدر حاقسيز بير حؤکمو حاکيمين نئجه وئرديگينه بير هفته دير تعجوبله نيردي. الي موعليم سويوققانليقلا:  

  - منيم گؤندرديگيم قوچ سايه سينده اوددوق! 

  - نه؟! سن حاکيمه قوچ گؤندردين؟  

  - بلي. 

  - بونا جسارت ائتدين ه… 

  - بلي، آما سن منه  " روشوت دوشمندير، کيم هديييه وئرسه، حاقسيز چيخار "  دئميشدينمي؟ 

  - بلي. 

  - من ده قوچو اؤز آديمدان گؤندرمه ديم. 

  - بس نه ائتدين؟ 

  - دوشمنيم موختار هويسوزوغلونون آديندان گؤندرديم. 

  - !!!.. 

  قوجا وکيلين قلم اليندن دوشدو. آرخايا يايخاندي. قارشيسيندا پارلايان باپبالاجا قارا گؤزلره باخا-باخا قالدي. مئيدانداکي بؤيوک چينار آغاجلاري نين درين پيچيلتيلاري، قاپيدا آياقدا دايانان علي موعليمين يانيندان، تپه سيندن، آياقلاري نين آراسيندان گيرير، ديوارلارينا کؤهنه ويلايت قزئتلري ياپيشديريلميش دوکانين ايچيني دولدوروردو… 

كؤچورن:عباس ائلچين

Ömer Seyfettin Ömər Seyfəddin

يازان : عباس ائلچین چهارشنبه ۱۳۸۹/۰۸/۱۹ |