بورا ايشه‌ين ائششکدير 

 مظفر ايزگو

        آه بير اليمه کئچه ده او، - بورا ايشه‌ين آدامي دئييرم، - ائله اورداجا بوغوب اؤلدوررم. بيزيم ديوارا نه اولدوسا ائله او واختدان سونرا اولدو. دؤزه بيلمه‌ينلر بورنو آمونياک ايگينه حساس اولدوغونا گؤره کوچه‌يه دؤنن کيمي بوراني  " کشف ائله‌ييرلر " . دوز ديوارين ديبينه ياخينلاشان کيمي بير ساغا باخيرلار، بير سولا باخيرلار، - عاييب اولماسين، - نه لازيمديرسا ائديرلر. هانسي بيري‌نين توتاسان، بير گون سحردن آخشاماجان گؤزله‌‌‌ديم. 38 آداملا ساواشديم، آغيزلاشديم. هله گؤر ساواشديغيم آداملاردان بيري نه دئدي: 

  - بلديييه لازيمي قدر توالئت تيکديرمير، بيز نئيله‌يک؟ 

  قيشقيرديم اوستونه: 

  - اوندا گل قوناق اوتاغيميزا دا ايشه، حئيوان اوغلو حئیوان. 

  او آداملا او قدر ساواشديم کي، ياخينليقداکي باققال بيزي گوجنن آييردي. اونون گؤزونون اوستونه يومروق ديديکجه دئييردي: 

  - نه بؤيوک ايش اولوب آخي، دؤزه بيلمه‌‌ديم، هم ده ثوابدي، - آي آخماق تا ائوده اوتورا بيلميريک، هاراسي ثوابدي بونون. - سونرا علاوه  ائتدي: 

  - اونسوز هاميسيني ائلمه‌ميشديم کي! 

  باققال قولومدان توتوب چکمه‌سه ، پارچالاياجاقديم اونو. بئله‌دير دا، هامي لازيم اولاني ائدير، راحاتلاشير، آخشام‌ اوستو او يئرلري يويوب-تميزله‌مک ده منه قالير. بير اليمده سو قابي، بير اليمده سوپورگه. ديليمده‌سه سؤيوش و قارغيشلار. سوپور کي، سوپور. گؤردوم کي يوخ، بئله داوام ائده بيلمز. ان ياخشي رنگلردن بيريني آليب بازار گونو، ديوارا يازديم:  " بورا ايشه ين ائششکدير " . البتّه، ديواردا بو يازيني گؤرن آدام، ائششکليگي بوينونا آلماماق اوچون قاداغاني پوزماياجاقدي. آما سحري گون آخشاما ياخين قاييداندا نه گؤرسم ياخشيدير، آمان آللاه، دونيادا نه قدره ائششک وار. ديوار سويون ايچينده دير. باخسان دئيرسن کي، بير-بيرييله ياريشا گيريبلر. ديوارين ديبيندن، پنجره يه قدر نمدير. آي آخماقلار بو ايشي نئجه گؤرورسوز؟ 

  - استغفوروللاه، يوخسا، آي حئیوانلار، اوتوروب ايشه‌ييرسيز؟ 

  آرادان بير هفته کئچدي. باخديم کي، بو يازي‌نين هئچ بير خئيري يوخدو. بو دفعه  داها تاثيرلي اولسون دئيه بئله يازديم: 

  - بورا ايشه ين ائششک اوغلو ائششکدير. 

  او گوندن سونرا جاماعات، سانکي آتاسيني ائششک ائتمک اوچون ياريشا گيرميشديلر، - نه واخت تينه دؤنسم آزي ايکي-اوچ نفرين جانيني راحاتلاديغيني گؤروردوم. 

  - اجلاف، اوتانميرسان اورا... 

  آداملاردا عار ائله‌مک، اوتانماق دئييلن شئيدن اثر-علامت يوخ ايدي. بعضيلري اوزومه باخيب هيريلداييرديلار. 

  نترسيز، ياخشيسيز، ياخشي راحاتلاشا بيلديز؟ - دئييرمميش کيمي باخا-باخا هيريلداييرديلار. 

  آنجاق آداملاردان بيري بير دفعه  بئله دئدي: 

  - باغيشلا قارداش، بو ائو سيزيندير؟ 

  يوخ، - دئديم. 

  - اوندا گل سن ده راحاتلاش. آخماغا باخ، گؤر بورا نه يازيب، اصلينده، ائششک اوغلو ائششک ائله اؤزودور. اونسوز دا، آداملار بوراني قارالاييبلار. بس بو آخماغا نه دوشوب، گؤره‌سن؟ بئله يازسايدي ياخشي اولاردي: خالقين خيدمتينده دير، ايسته ديگينيز قدر ايشه‌یين. 

  - آخماق، ردد اول بوردان، - دئييب اوستونه يئريديم. بير تهر قاچدي اليمدن. او گوندن سونرا همين يازي‌نين آلتینا بو سؤزلري علاوه  ائتديم: 

  - بورا ايشه ين حئیوان اوغلو حئیواندير. 

  سحري گون گليب گؤردوم کي، سؤزلري هؤججله‌يه-هؤججله‌يه سيلمه‌يه چاليشير. هم ده شيرهاشير ايشه‌يير. ايشيني بيتيريب ...دويمله‌يندن سونرا اوز-اوزه گلديک: 

  - گؤرورسن دا، قارداش، دودوک بورا نه يازيب. - دئيه‌سن، ائله بيلدي کي، من ده بورا ايشمگه گلميشم. جيبيندن رنگلي بير قلم چيخارديب ايري حرفلرله يازماغا باشلادي. 

  - بورا ايشمه‌ين کؤپک اوغلودور. ¬- منه ساري چئوريليب هيريلدادي: 

  - ياخشي، يازديم، هه؟ 

  حئيرتدن دونوب قالميشديم. هيريلدايا-هيريلدايا چيخيب گئتدي. دئمه‌لي بئله، او گوندن سونرا بيزيم ديوار  " ديله گلدي " . بير گون سونرا گليب گؤردوم کي بو سؤزلري يازيبلار: 

  - اجلاف، ائششک اولماماق اوچون ايشمه‌ديم، آما بيل کي، بونو يازان ائله کؤپکدير. - سحري گون او يازي‌نين آلتيندا باشقا بير يازي وار ايدي:  

  - کؤپک سنين آتاندير، نه دئييب کي، دئييب راحاتلاش دا! 

  اوندان سونرا، سؤزون اصل معناسيندا، توالئت ادبياتي يازيلماغا باشلادي. 

  -  " بونو يازان توسون، اوخويانا سورسون " . 

  داها سونرا ديداکتيک فصل باشلادي. 

  - هر ميلتي توالئتيندن تانيماق اولور، جناب. بورا هئچ نه يازما، بورا بير توريست ده ايشه‌يه بيلر. 

  سحري گون اونا جاواب يازميشديلار: 

  - اي سفئه، توريست بوراني گؤرسه، شکلي‌نين چکيب توريزيميميزي بالاتلايار. 

  ديوار گونبَگون يازييلا دولوردو. مني ده ماراق حیسي بوروموشدو،  " گؤره سن، ايندي جاماعات نه يازير "  دئيه دوشونوردوم. ديوار يوخ، سانکي موقدس  " قارا کوادرات "  ايدي. کيمين عاغلينا نه گليرديسه يازيردي. مثلا، بيري يازيردي: 

   " ساغا باخ " ، دئييردي. ساغا باخديم. يازيلميشدي:  " سولا باخ " . ايندي ده سولا باخديم، اوردا دا بير اوخ ايشاره سي واردي:  " يوخاري باخ " . باشيمي قالديريب يوخاري باخديم:  " آي آخماق، ساغا-سولا باخماقدانسا اؤز ايشينه باخ " . 

  هه واللاه، بئله وضعيتده نئجه دلي اولماياسان. همين گون حيرصله‌نيب پوليس ايداره سينه گئتديم. پروکورورون اوتاغينا قالخديم و دئديم: جناب پروکورور، درده دوشموشوک، بيزي بو درددن قورتارين. 

  ¬نه اولوب؟ - سوروشدو. 

  بوتون اولانلاري اولدوغو کيمي دانيشديم. پروکورور دئدي: - ياخشي، آي قارداش، بو ايشه بلدييّه 

  باخير، بيزيم صلاحيبّتيميزه داخيل دئييل.  

  اوز توتدوم بلديييه ايداره‌سينه. بو جور ايشلره مسئول اولان شخصي تاپيب بوتون اولانلاري دانيشديم. 

  - سيز هئچ ناراحات اولمايين بيز نه لازيمديرسا، ائده‌ريک - دئدي. 

  آرادان بير هفته کئچندن سونرا آخشام اوستو ائوه گلنده آرواديم منه بير کاغيذ اوزاتدي. 

  - بو نه کاغيذيدير؟ - سوروشدوم. 

  بلديييه ايداره‌سيندن بيلديريش گليب. 

  - آي آللاه راضي اولسون. 

  باشا دوشمه ديم؟ - آرواديم دئدي. 

  - آللاه بلديييه ايشچيسيندن راضي اولسون، بيزي بو بلادان قورتاراجاق. 

  - بير اوخو اوندان سونرا دوعا ائله. 

  اوخودوم، اوخودوقجا بئينيمه قان سيچرادي. آللاه آماندي، يولو چيرکلنديرديگيميزه، گيگييئنيک(بهداشتی) قايدالارا رعایت ائتمه‌ديگيميزه، اطراف موحيطي پوزدوغوموزا، کوچه‌ني موردارلاغيميزا گؤره يوز ليرا پول جزاسي اؤدمه‌لي‌ ايديک. 

  تئز بله ديييه ايداره سينه گئتديم، بو ايشله مشغول اولان آدامي تاپيب دئديم: - آي قارداش، بو نه ايشدي بئله منيم باشيما آچميسينيز؟ - حيرصيمدن آز قالا آغلاياجاقديم. مسئول شخص اول بيلديريشه، سونرا منه باخيب دئدي: 

  - سيز هئچ ناراحات اولمايين يولونا قوياريق، آما گرک سيز بو پولو اؤديه‌سينيز، چونکي جزا مبلغي تصديق اولونوب. 

  - آللاه خاطيرينه بئله ائلمه، آي قارداش، ائوه ديناميت قويوب گؤيه اوچوراجام واللاه. 

  - يوخ، بو قدر عصبيلشمه‌يه احتيياج يوخدور. سيز خزينه‌يه يوز ليرا اؤده‌یين، بيز بو ايشي ساهمانا سالاجاغيق. 

  نئيله‌مک اولار، يوز ليراني اؤده‌ديم خزينه‌يه، بوينو بوکوک حالدا ائوه ساري گلديم، کوچه‌يه دؤنن کيمي گؤردوم کي، بير آدام اوزونو ديوارا توتوب ايشه‌يير. وار گوجومله قيشقيرديم: 

  - دويمه‌ني باغلا، - يازيق هئچ پالتاريني دا دوزلتمه‌دن قاچدي. 

  بير هفته سونرا چرشنبه آخشامي آرواديم منه يئنه کاغيذ اوزاتدي، کاغيذا باخان کيمي تانيديم: - عمللرينيزده ايصرار ائتديگينيزه گؤره، توالئته يوخ ديوارا ايشه‌يه‌رک کوچه‌ني چيرکلنديرديگينيزه، بوندان اولکي خبردارليغا رعایت ائتمه‌ديگينيزه گؤره 200 ليرا پول جزاسي اؤدمه‌لي‌سينيز " . 

  اوف، اوف. اوف، واللاه، دلي اولاجاغام. 

  کاغيذي همين آنداجا جيرديب نئجه پنجره دن توللاميشامسا... 

   " من سيزه گؤسترررم، آخماقلار " . 

  سحري گون ديوارين دؤشونه بير ماسا قويدوم، بير ده کاغيذ ياپيديرديم:  " کييچيک بايير: 25 قوروش، کاغيذ 25 قوروش، کولوننا 25 قوروش " . بير ده لؤوحه آسديم:  " کيچيک باييرا گئتمک سربستدير " . به، به نئجه گؤزل ايميش. ايندي دونيانين پولونو قازانيرام...   

 ديليميزه اويغونلاشديران: فريد حسین

کؤچورن:عباس ائلچین