آذربایجان خالق گولمه‌جه‌لری

عباس ائلچین

 

آللاهدان بؤیوک!

بیر اوشاق بؤیوک باباسیندان سوروشور:

- دونیادا ان بؤیوک نمنه‌دیر؟

بؤیوک بابا جاواب وئریر:

-  داغلار..

اوشاق یئنه سوروشور:

-  داغلاردان بؤیوک نمنه‌دیر؟

-  داغلاردان بؤیوک دنیزلردیر...

-  دنیزلردن بؤیوک؟

-  دنیزلردن بؤیوک یئر کوره‌سی‌دیر

-  یئر کوره‌سیندن بؤیوک؟

-  یئر کوره‌سیندن بؤیوک گؤیلردیر یئری قوینونا آلیب

-  گؤیلردن بؤیوک نمنه‌دیر؟

-  گؤیلردن بؤیوک آللاه‌دیر

-  آللاهدان بؤیوک نمنه‌دیر؟

کیشی بیر آز دوشونوب سونوندا جاواب وئریر:

-  اوغلوم! آللاهدان بؤیوک، منیم گوناهلاریم‌دیر!

بو جاواب تانری درگاهینا خوش گلیب غیب‌دن سس گلیر:

-  بؤیوک بابا!... گوناهلارینا عفو قلمی چکیلدی آللاهدان بؤیوگو اولماسین!

 

ائرکک بولود

بیر گون موسا حضرتلری طور سینایا گئدنده، داغدا کندین چوبانی  ایله قارشیلاشیر. چوبان قویونلاری دره‌ده یاییمیش اؤزوده بیر داشا سؤیکه‌نیب ماهنی اوخوریوردو. موسا اسنلشمه‌دن گؤیده‌کی قارا بولودو چوبانا گؤسته‌ره‌رک اوستونه چیمخیریر:

- آی چوبان! او قارا بولودو گؤرمورسن‌می؟ تئز اول قویونلاری دره‌دن ائشیگه چیخارت، یاغیش یاغیب سئل داشلانار، قویونلاری آپارار!

چوبان گوله- گوله:

- ای تانری‌نین بؤیوک یالاواجی! او بولود ائرکک‌دیر، یاغماز- دئییر.

بو یانیت موسایا آغیر گلیر:

- بولودون ائرکک- دیشیسی  اولماز؟!.. من دئییرم یاغاجاق سن‌ده دئ یاغاجاق!..

چوبان بیر شئی دئمه‌ییب ماهنی اوخوماغینی سوردورور.

    موسا تانری قاتینا چاتیب آستاناسیندا آلین یئره سورتدوکدن سونرا:

- تانریم! اولانلار اؤزونوزه آیدین‌دیر، او قارا بولودو هاچان یاغدیرتدیراجاق‌سینیز‍‍؟- دئییر.

تانری گولومسه‌ییب:

- ائی موسا! او بولود ائرکک‌دیر یاغماز!..- دئییر-  تکجه دیشی بولودلار یاغار.

موسا داریلیر:

- تانریم! او قارا بولود یاغماسا من ائل ایچینده بیر پوللوق اولارام، آرتیق کیمسه منیم دئدیکلریمه اینانماز، سیزه یالواریرام او بولود یاغدیرتدیراسینیز.

تانری، موسانی قیرماییب ائرکک بولودو یاغدیرتدیریر!!

    موسا قاییدان باش گؤرور چوبان اؤتوروب باش- گؤزونه تاپدایاراق آغلاییر.

- چوبان قارداش من سنه دئمه‌دیمی قویونلاری دره‌دن چیخارت یاغیش یاغار، سئل گلر؟!

چوبان وایسینا- وایسینا :

- آللاه باعیثین بالالارینی اؤلدورسون- دئییر.- آللاهدا بیلیر او بولود ائرکک ایدی!!

 

آتاسینی واق ائله‌مک!

بیرکیشی  یاراماز اوغلونا اؤیود وئریردی:

-         اوغلوم! گؤردوگون پیس ایشلردن ال چکمه‌سن سنی عاق ائله‌یه‌جگم..

اوغلان گولدو:

-         آتا سن منی عاق ائله‌سن، من ده سنی واق ائله‌یه‌جگم!

کیشی چاشدی:

-         واق ائله‌مک  نه دئمکدیر؟!

اوغلان سویوق‌قانلیلیقلا آچیقلادی:

-         هئچ!.. گئدیب دؤرد یولون آیریمینا سیچاجاغام، گلیب گئده‌نین آیاغی  باتیب دئسینلر: وای آتانا لعنت بورا سیچان!

 

آللاه کریم‌دیر!

    بیر کندلی، قویونلارینی شهرده ساتیب قاییداندا اوغرولارا توش گلیب سویولور.  یازیق کیشی کنده یئتجک باشینا تاپدایا-تاپدایا آغلاییب-سیزلاماغا باشلاییر:

-         وار- یوخوم الدن گئتدی!..ائویم ییخیلدی!.. بدبخت اولدوم!..

کندلیلر باشینا ییغیشیب توختاقلیق وئرمگه باشلاییرلار:

-         چوخ اوزولمه کیشی!.. ایشدیر اولوب..‌آللاه کریم‌دیر..

کیشی اؤفکه ایله کندلیلره قاباریر:

-    نه آللاه کریم‌دیر؟!.. ائله اوغرولارین بیری‌نین آدی کریم ایدی!..

 

يازان : عباس ائلچین چهارشنبه ۱۳۹۵/۰۴/۰۹ |