دوه اورگی

عزیزه جعفرزاده

بير کندلي‌نين بيرجه دوه‌سي واردي. قونشوسونون دا دوه‌سيني امانتن گؤتوروب، ايکي دوه ايله کاروانا قوشولور. قاييداندا دوه صاحيبي گؤرور کي، اونون دوه‌سي الدن دوشوب:

-کيشي، قونشو حاقي سن منيم دومين باشينا نه گتيرميسن؟ اونو نه قدر يوکلميسن؟

-واللاه، قارداش، اؤز دوه‌مه نه قدر يوکله‌ميشمسه، سنينکينه ده او قدر يوک وورموشام.

-پيس باخميسان، ناوالاسين…

-واللاه، اؤز دوه‌مدن پيس باخميشامسا، بالام اؤلسون…

غرض، دوه دوشور اؤلور. کندين باش‌بيلنلري ييغيشيب دوه‌ني کسير، سويور، ايچ‌آلاتينا ديقّتله فيکير وئريب گؤرورلر کي، دوه هر جهتدن ساغلامميش، آنجاق بيرجه دوه‌نين اورگينده بالاجا آغ لکه وار.

-کيشي، دوزونو دئ، نئينميسن؟

-واللاه، اونو اؤز دوه‌مدن آييرماميشام. تک بيرجه دفعه توز بورولغانيندا اونلاري اوز-اوزه ياتيرديب، اؤزوم ده آرالاريندا گيزلنميشم، اوچوموزون ده باشيميزين اوستونه ياش اؤرتوک آتميشام. بيرجه او اولوب کي، همين واختدا اوزومو اؤز دوه‌مه چئويرميشم. قوجالار:

-هه… دوه‌نين قلبينه صاحيبسيزليگي دَييب؛ اورگينه خال دوشوب. دؤزمه‌ييب…
کؤچورن: عباس ائلچین

يازان : عباس ائلچین یکشنبه ۱۳۹۶/۱۰/۱۷ |