گچينِم اؤز آياغيندان آسارلار، قوْينام 
بأهليلي دانانينگ اينيسي هارۇن رشيت اۇلي پاتيشا اکن. اوْل اؤز آغاسي بأهليلي داناني يانينا چاغيريپ: 
- آي، بأهليلي، سن بۇ ديواناچيليق-گدايچيليغينگدان ال چک، اينه، سانگا خازينا، نأمه گرک بوْلسا گؤتر - ديين. 
اوْندا بأهليلي دانا: 
- آي، پاتيشا، بيز هر نيچيک آغا-اينم بوْلساق، سنينگ پاتيشاليق بيلن قازانان مالي-دۆنيأنگدن چيگيت يالي زات درکار دأل، سن يؤنه مني اؤز گۆنۆمه قوْي - ديييپدير-ده، اؤزۆنينگ ويرانا هوْولۇسينا اؤتأگيديپدير. بأهليلي دانانينگ هوْولۇسي هارۇن رشيت پاتيشانينگ کؤشگۆنه ياقين اکن. هارۇن رشيت هر گۆن تاغتيندا اوْتۇران واغتيندا بأهليلي دانانينگ آهي-حاسرات بيلن دادي-پريات اديپ آغلايان غاملي سسيني اشيدر اکن. 
گۆنلرده بير گۆن هارۇن رشيت تاغتينا چيقيپدير، گؤرسه بۇ گۆن بأهليلي دانانينگ هوْولۇسيندان هميشه‌کي اشيديليأن غاملي سسينگ درِ‌گينه شاتليقلي اوْواز گليأرميش. بأهليلي دانا يکه اؤزي اؤز باشينا دألي-پوْرهان بوْلۇپ، هم ساز چاليار، هم آيديم آيديار اکن. هارۇن رشيت مۇني اشيديپ، گنگيرگه‌نيپ: 
- بارينگ ديواناني آليپ گلينگ، اوْندان خابار آلالينگ - ديييپ، ياساوۇللارينا بۇيرۇپدير. 
ياساوۇللار بأهليلي داناني آليپ گليپديرلر. پاتيشا: 
- يري، بأهليلي، سن هميشه گۆنۆنگي قايغي-غام بيلن آغلاپ گچيريأردينگ، بۇ گۆنکي شاتليغينگ نأمأنينگ حکاياتي؟ - ديييپ سوْران.
- آي، پاتيشام، اشيدر بوْلسانگ، من بۇ گۆن بازارا بارديم - ديييپ، اوْل سؤزه باشلان. 
- بارسانگ باريپسينگ-دا بازارا، اوْل تايدا نأمه بيله شاتليق گؤردۆنگ؟ 
- پاتيشام، قاصّاپ بازارينا بارديم، گؤرسم گچينم اؤز آياغيندان آسيپديرلار، قوْينام اؤز آياغيندان آسيپديرلار. من، ايکيميز آغا-ايني بوْلانيميزدان سوْنگ، سنينگ تاغتدا اوْتۇريپ، ايل-خالقا اديأن ظۇلۇم-سۆتمينگ هم ظاليمليغينگ اۆچين منم گۆنأکأر بوْليانديرين اؤيدۆپ قوْرقۇپ، هميشه آغلار يؤررديم ولين، آصيل بيله دأل اکن. بۇ گۆن من بازاردا گچينينگم اؤز آياغيندان آسيليانيني، قوْينۇنگام اؤز آياغيندان آسيليانيني گؤردۆم و هر کيمينگ اؤز ادن گۆنأسي اۆچين جزا آلجاغينا دۆشۆنديم. شوْنۇنگ اۆچين هم واغتيم خوْش بوْلۇپ، شاتلانيپ اوْتۇريشيم - ديييپ، جوْغاپ بريپ، چيقيپ گيدن. 

کؤچۆرن: عباس ائلچین

[A:آ،ا- Ä: أ-E:إ، ه - U: ۇ- O: وْ- Ü: ۆ- Ö: ؤ- I:ی- Y:ی]

يازان : عباس ائلچین دوشنبه ۱۳۹۷/۰۸/۲۱ |