آنا دیلیمه

محمد گنجه 

زينداني اولوبسان ايللر بويونجا 

سنله دانيشماغا قويماييب خاين 

ايندي قوي دانيشيم سنله دويونجا 

آنام ياديگاري سنسن ناز‌نين 

*** 

سنينله سؤزوم وار بير قَدَر درين 

ندن سن اولوبسان بو قدر شيرين؟ 

سنينله دانيشير گؤيلرده شاهين 

سنينله آچيلير ياسمن، نسرين

*** 

ائي منيم قلبيمين آچاري ديليم 

سؤيله‌سن، دونيايا ندير امليم؟ 

ايشده، بيلديرمکدير منيم عمليم 

عالمه نقلدير ، شيرينسن، شيرين 

***

تاريخين بؤيوکدور، چوخ دا قوجامان 

بؤيوک سرکرده‌لر ديليسن، اينان 

سنينله دانيشير بو آذربايجان 

سنه اؤيله دئييبدير گؤيلر، آفرين 

*** 

سن اولدون ستارخان ظفر فرماني 

آذرلر ديليسن، ائللر سولطاني 

تار-مار اولاجاق ظولمون بيناسي 

سنين فرمانينلا، ائي شهدي-انگبين

*** 

آزادليق فرماني سنينله اينشا 

اولاجاق وطنيم ايراندا، آنلا 

سنين حؤکمون ايله اولاجاق بينا 

حوريّت قانونو، ائي ديليم، يقين 

*** 

ياراجاق تاريخلرين هر زامان 

سنله فخر ائده‌جک آذربادِگان 

سنينله گؤره‌جک تاريخ اوخويان 

اولوب دموکراسي ايراندا تضمين 

*** 

ايفتيخار ائله‌ييب سنله جاوانشير 

سؤيله‌ييب اجداديم ياديگاريدير. 

بس من ده سؤيله‌یيم سيزلره بير-بير 

ياشاسين ديليميز، دئسينلر آمين! 

ياشاسين ديليميز، دئسينلر آمين! 

"آذربايجان" قزئتي. آذربايجان دموکرات فيرقه‌سي‌نين اورقاني، تبريز. نؤمره 84، 23 دِکابر 1946 

تقديم ائدن صمد بايرام‌زاده

يازان : عباس ائلچین یکشنبه ۱۳۹۸/۰۳/۱۲ |