سئوینج

آنتوان چخوف

گئجه ساعات اون ايکي ايدي. 

ميتيا کوُلداروْو جوشغولو، ساچلاري پيرتلاشديريلميش حالدا تلم-تله‌سيک واليدئينلري‌نين ياشاديغي منزيله گلدي، سونرا تئز اوتاقباوتاق گزدي. واليدئينلري ياتماغا حاضيرلاشيرديلار. باجيسي چارپاييسيندا اوزانميشدي و اوخودوغو رومانين آخيرينجي صحيفه‌سينده ايدي. گيمنازيست قارداشلاري‌سا يوخودايديلار. 
– هاردان گليرسن؟ –واليدئينلري تعجوبلنديلر. –نه اولوب؟ 
–هئچ بيليرسيز نه اولوب؟! گؤزله‌نيلمز اولدو! يامان گؤزله‌نيلمز اولدو! بو هئچ... عاغلاباتان دئييل! 
ميتيا قهقهه چکه‌رک خوشبختليکدن دوروش گتيره بيلميرميش کيمي کرئسلويا چؤکدو. 
–بو، اينانيلماز بير شئي! هئچ تصوور ائتمزسيز! گؤر ائ... 
باجيسي چارپاييسيندان سيچرادي و اديالي چيينينه آتيب، تئز قارداشينا ياخينلاشدي. گيمنازيستلر ده اويانديلار. 
–نوْوْلوب سنه؟ تانينماز اولوبسان! 
–سئوينجدندي، آناجان! ايندي مني بوتون روسيه تانييير! روسيه! اوّل بو دونيادا کوللئج رئگيستراتورو دميتريي کوُلداروْو کيمي تکجه سيز تانيييرديز مني، ايندي حاقيمدا بوتون روسيه بيلير! آناجان! آي، آللاااه! 
ميتيا يئريندن سيچراييب، اوتاقباوتاق يويوروب يئنيدن اوتوردو. 
–اخي نوولوب، دئسنه؟ دانيش گؤرک!
– سيز غريبه سيز، قزئت اوخومورسوز، آشکارليق ندير بيلميرسيز، قزئتلرده ائله ماراقلي شئيلردن يازيرلار کي! نه باش وئرديسه، درحال يازيرلار! من نئجه ده خوشبختم! آي، آللاه! قزئتلرده آنجاق مشهورلاردان يازيرلار، بيردن-بيره منيم حاقيمدا دا! 
–حقيقي‌ي‌ي؟ هاردا؟ 
آتاسي‌نين رنگي قاچدي. آناسي ديوارداکي صورته باخيب خاچ چکدي. گيمنازيست قارداشلار اوتاغا ياتاق گئييملرينده‌جه سيچراييب، بؤيوک قارداشلارينا ياخينلاشديلار. 
–بلي-بلي! حاقيمدا يازيبلار! ايندي منيم باره‌مده بوتون روسيه بيلير! هه، آناجان، بو قزئت نؤمره‌سيني خاطيره کيمي ساخلايين! آرادابير اوخوياجاغيق! بير باخين!
ميتيا قزئتي جيبيندن چيخاريب، آتاسينا اوزاتدي و گؤي کارانداشلا دايره‌لنميش يئري بارماغي‌ ايله گؤستردي. 
–اوخويون! 
آتا عئينگيني تاخدي. 
–اوخويون دا! 
آنا صورته باخيب، يئنيدن خاچ چکدي. آتا بوغازيني آريتلاييب، اوخوماغا باشلادي: 
–"29دئکابر، گئجه ساعات 11-ده، کوللئج رئگيستراتورو دميتريي کوُلداروْو... 
–بير باخين، باخين! آردي!
– ...کوللئج رئگيستراتورو دميتريي کوُلداروْو، کوْزيخينين کيچيک بروْننيداکي پيوه‌خاناسيندان سرخوش وضعيتده چيخارکن... 


–او منم، سئميون پئتروْويچله‌يم... دقيق‌ليگيله يازيليب ها! داوام ائدين! سونرا، سونرا! دينله‌یين!
–... سرخوش وضعيتده چيخارکن سوروشموش و اورادا دايانميش يوُخنوْوسکي قزاسينداکي دوُريکين کنديندن اولان ايوان دروْتوْووُن آتي‌نين آلتينا ييخيلميشدير. هورکموش آت، کوُلداروْوون اوستوندن آدلاياراق و ايچريسينده ايکينجي گيلدييا درجه‌لي موسکوالي تاجير ستئپان لوُکوْو اولان خيزه‌یي اونون اوزريندن دارتميش، کوچه بويو برک چاپميش و نهايت، آت سوپورگه‌چيلر طرفيندن ساخلانميشدير. کوُلداروْو هوشسوز وضعيتده اوّل پوليس بؤلمه‌سينه آپاريلميش و حکيم طرفيندن موعايينه اولونموشدور. پئيسريندن آلديغي ضربه... 
 –منيم قوشقويا چيرپيلماغيمي دئيير، آتا، باخين. 
–اوخويون! آرديني اوخويون! 
–...پئيسريندن آلديغي ضربه يونگول حساب ائديلميشدير. حاديثه باره‌ده پروتوکول ترتيب ائديلميشدير. ضررچکميش شخصه طیبی يارديم گؤستريلميشدير..." 
– بوينومون آرديني سويوق سويلا ايسلاتماغي مصلحت گؤردولر. اوخودوز؟ هه؟ ايش ده ائله اوراسيندادي دا!.. بوتون روسيه‌یه ياييلدي! وئرين بورا!
ميتيا قزئتي قامارلاييب قاتلادي و جيبينه دورتدو. 
–ماکاروْوگيله قاچيم، اونلارا گؤستره‌جم...سونرا هله ايوانيتسکي‌گيله گؤسترمک وار، سونرا ناتاليا ايوانوْونايا، آنيسيم واسيليئويچه... من قاچديم! سالامات قالين! 
ميتيا کوْکاردالي فوُراژکاسيني گئييب، شادياناليق و سئوينج ايچينده کوچه‌يه قاچدي. 
1883 
ترجومه: ايلقار تاغي 

کؤچورن:عباس ائلچین

يازان : عباس ائلچین دوشنبه ۱۳۹۸/۰۳/۲۷ |